Psalms 21
Месихнинъ азаплары ве шурети акъкъында
1Баш чалгъыджы ичюн. «Аййелет хашшахар» авасында. Давутнынъ зебуры.2 aАллам! Аллам!
Сен не ичюн Мени къалдырып кеттинъ?
Не ичюн манъа ярдым этмектен,
фигъаныма къулакъ асмакътан узакътасынъ?
3 bЭй, Аллам, куньдюзлери Сени чагъырам,
амма Сен манъа джевап бермейсинъ,
геджелери де Сени къыдырам,
лякин раат оламайым.
4Сен Мукъаддессинъ,
Исраильнинъ макътавлары арасында отурасынъ.
5Баба-деделеримиз Санъа ишанды;
олар Санъа ишанды,
ве Сен оларны къуртардынъ.
6 cОлар Сенден ярдым истеди,
ве Сен оларны къорчаладынъ.
Олар Санъа ишанды ве алданмадылар.
7 dЛякин мен акъай дегиль, къуртым мен;
адамлар мени масхара эте,
халкъ исе менден игрене.
8 eМени корьген эр кес мени мыскъыллай,
башларыны саллап, менден нефретленип, лаф этелер:
9«О, РАББИге ишанды! РАББИ оны сакъласын!
РАББИ ондан разы олса, оны къуртарсын!»
10 fСен мени анамнынъ къурсагъындан чыкъардынъ,
анамнынъ къучагъында олгъанымда,
Санъа ишанмагъа огреттинъ.
11Догъулгъанымдан берли мен Санъа берильдим,
мен анамнынъ къурсагъындан чыкъкъанымдан берли
Сен меним Алламсынъ.
12 gЭнди менден узакълашма,
чюнки беля якъынлашты,
ярдым этеджеклер исе ёкъ.
13 hЧокъ бугъалар мени сарып алды,
къуветли Башан бугъалары этрафымны сарды.
14Парчаламагъа азыр олып,
окюрген арслан киби,
олар манъа агъызларыны ачты.
15 iМен, сув киби, тёкюльдим,
бутюн кемиклерим бугъумларындан айырылды,
юрегим ичимде, балавуз киби, ирип битти.
16Къуветим, балчыкъ череп парчасы киби, къуруды;
тилим танълайыма япышып къалды;
Сен мени олюм топрагъына яткъыздынъ.
17 jМына, копеклер мени сарып алды;
ачувлы сюрю этрафымны сарды,
олар къолларымны ве аякъларымны тештилер ▼
▼Даа бойле терджиме этмеге мумкюн: «Олар, арслан киби, къолларымны ве аякъларымны йырталар».
.18 lКемиклеримни бирер-бирер саймагъа мумкюн,
олар исе манъа тикилип бакъалар.
19 mУрбаларымны озьара болелер,
кийимлерим ичюн джереп чекелер.
20Я РАББИ, менден узакълашма!
Сен манъа къувет бересинъ,
манъа ярдымгъа ашыкъып кель!
21 nДжанымны къылычтан къуртар,
копек панджасындан бирден-бир аятымны сакъла!
22 oМени арслан агъзындан къуртар,
кийик бугъаларнынъ бойнузындан къуртар!
Сен манъа джевап бердинъ.
23 pСенинъ Адынъны агъа-къардашларыма айтып берерим,
топлашув ичинде Сени макътарым!
24 qЭй, РАББИден къоркъкъанлар,
Оны макътанъыз!
Эй, Якъупнынъ сою, Оны шуретленъиз!
Бутюн Исраиль сою Онъа урьмет косьтерсин!
25О, фукъаренинъ къайгъысындан игренмеди ве нефретленмеди,
ондан юзюни чевирмеди,
лякин онынъ чагъыргъанына къулакъ асты.
26 rБуюк топлашувда Сени макътайджагъым;
Сенден къоркъкъанларнынъ огюнде
адакъларымны ерине кетиреджегим.
27Фукъарелер ашап тойсунлар;
РАББИни къыдыргъанлар Оны макътасынлар;
юреклеринъиз эбедий яшасынлар!
28 sДюньянынъ дёрт кошесинде яшагъан адамлар
РАББИни хатырлап, Онъа къайтаджакълар;
бутюн халкъларнынъ къабилелери Санъа бель букеджеклер.
29 tПадишалыкъ РАББИнинъкидир,
О, халкъларнынъ устюнден укюм эте.
30Ер юзюнде бутюн сагъламлар ашкъа тойып,
Онъа бель букеджеклер.
Топракъ ичине киргенлернинъ эписи,
озь омрюни сакълап оламагъанларнынъ эписи
Онынъ алдында тиз чёкеджеклер.
31 uМеним эвлятларым Онъа хызмет этеджек,
олар эбедиен РАББИнинъки оладжакъ.
32 vОлар, келеджекте догъуладжакъ адамларгъа келип,
Онынъ акъкъында бутюн акъикъатны
ве Онынъ япкъанларыны хабер этеджеклер!
Copyright information for
CrhCTB