‏ Psalms 32

Макътав йыры

1Эй, инсафлылар, РАББИ ичюн къычырып севининъиз!
Догъру юреклилерге шукюр сёзлери яраша.
2 ^aСантыр чалып, РАББИге шукюр этинъиз,
Он телли арфада Онъа чалгъы чалынъыз!
3 ^bОнъа янъы бир йыр йырланъыз,
Онъа къычырып, усталыкънен йырланъыз!
4РАББИнинъ сёзю догърудыр,
Онынъ бутюн ишлери ишанчлыдыр!
5 ^cО, акъикъат ве адалетни севе;
дюнья РАББИнинъ севгисине толды.
6 ^dКоклер РАББИнинъ сёзюнен яратылгъан,
бутюн кок ордулары Онынъ Рухунен япылгъан.
7 ^eО, денъиз сувларыны обалап къойгъан,
тюбю олмагъан чукъурларны Озь анбарына ерлештирген.
8Бутюн ер юзю РАББИден къоркъсун,
дюньяда яшагъанларнынъ эписи Онынъ огюнде къалтырасын!
9 ^fО, айтты – айткъаны олды;
О, буюрды – эмири беджерильди.
10 ^gРАББИ башкъа миллетлернинъ ниетини боза,
халкъларнынъ мурадыны ёкъ эте.
11 ^hРАББИнинъ ниети исе эбедий тура,
Онынъ юрегининъ мурады несильден несильге кече.
12 ⁱНе де бахтлыдыр «РАББИ – Алламыз» деген халкъ!
РАББИ Озюне сайлагъан халкъ не де бахтлыдыр!

13 ^jРАББИ коктен бакъа, бутюн инсан огъулларыны коре.
14 ^kО, Озь отургъан еринден
ер юзюнде яшагъанларнынъ эписини коре.
15О, бутюн адамларнынъ юрегини яраткъан,
инсан ишлерини бутюнлей анълай.
16 ^lАскерлери чокъ олса да, падиша къуртуламаз,
батырнынъ буюк къудрети онынъ озюни къорчаламаз.
17 ^mАдам аткъа бошуна умют этер,
бу ат буюк къуветинен кимсени къуртарып оламаз.
18 ⁿМына, РАББИ Ондан къоркъкъан адамларны,
Онынъ севгисине ишангъан адамларны коре.
19 ^oОлар: «Алла бизим джанларымызны олюмден къуртарыр,
ачлыкъ вакътында бизни сакълар», – деп беклейлер.
20 ^pДжанымыз РАББИге ишана.
О, бизге ярдым этер ве бизни къорчалар.
21Юрегимиз Онынъ ичюн къувана,
биз Онынъ мукъаддес Адына ишанамыз.
22Я РАББИ, биз Санъа умют багъладыкъ,
Сенинъ севгинъ бизнен олсун!