‏ Psalms 36

Инсафлыгъа одеме

Давутнынъ зебуры.

Алеф 1 ^aЯманлыкъ япкъанлар ичюн къасевет этме,
къанунны бозгъанларгъа сукъланма!
2 ^bОлар, от киби, тезден чалынаджакъ,
ешиль осюмлик киби, солып кетеджеклер.
Беит 3РАББИге ишанып, яхшылыкъ яп,
ер юзюнде яшап, акъикъатны тут.
4 ^cРАББИден зевкъ ал,
ве О, санъа юрегинънинъ истеклерини берер.
Гимел 5 ^dЁлунъны РАББИнинъ тарафына чевир,
Онъа ишан, ве О, арекет этеджек.
6 ^eО, сенинъ акъикъатынъны, ярыкъ киби, парылдатыр,
догърулыгъынъны, уйле ярыгъы киби, япар.
Далет 7РАББИнинъ огюнде индемейип отур,
Онынъ джевабыны сабырнен бекле.
Яманлыкъ япкъанлар ичюн къасевет этме.
Хе 8Ачувынъны токътат, гъазабынъны ятыштыр,
тарсыкъма – бу шей тек белягъа алып бара.
9 ^fЯманлыкъ япкъанлар къырылып ташланаджакъ,
РАББИден джевап беклегенлер исе ер юзюнинъ саиплери оладжакълар.
Вав 10 ^gБираздан сонъ ярамай адамлар ёкъ оладжакъ,
онынъ ерине бакъсанъ, анда ич кимсе ёкъ.
11 ^hАлчакъгонъюллилер исе ер юзюнинъ саиплери оладжакъ,
олар аманлыкънынъ чокълугъынен зевкъ сюреджеклер.
Зайин 12 ⁱЯрамай адам инсафлыгъа яманлыкъ тилей,
онъа къаршы тишлерини гъыджырдата.
13 ^jРАББИ исе онынъ устюнден куле,
онынъ куню биткенини коре.
Хет 14Фукъарени ве факъырны ерге урмакъ ичюн,
догъру ёлдан юргенлерни ольдюрмек ичюн,
ярамай адамлар къылычыны чыкъара да, яйларыны тарталар.
15 ^kАмма къылычлары озьлерининъ юрегине сапланаджакъ,
яйлары исе сындырылып парчаланаджакълар.
Тет 16 ^lИнсафлынынъ къолундаки аз шей
чокъ инсафсызнынъ зенгинлигинден яхшыдыр,
17 ^mчюнки инсафсызнынъ къудрети сындырылып кетеджек,
инсафлыларгъа исе РАББИ кучь береджек.
Ёд 18 ⁿРАББИ къабаатсызларнынъ куньлерини биле;
оларнынъ мирасы эбедиен оладжакъ.
19 ^oАгъыр заманда олар масхара олмаз,
ачлыкъ куньлеринде де ашап тояджакълар.
Каф 20 ^pАмма ярамайлар гъайып оладжакъ,
РАББИнинъ душманлары исе, къой ягъы киби,
тютюн ичинде ирип кетеджек.
Ламет 21Инсафсыз борджкъа алып, оны къайтармай,
инсафлы исе мерамет эте де, бере.
22Алла Озю О, разы олгъан адамларгъа
ер юзюни малы-мулькю киби береджек.
О, къаргъагъан адамлар исе къырылып ташланаджакълар.
Мим 23 ^qРАББИ адамнынъ адымларыны догъурта,
ве О, онынъ ёлундан разы олур.
24 ^rШу адам йыкъылгъанда биле, ерге тюшмез,
чюнки РАББИ онынъ къолуны тута.
Нун 25 ^sМен яш эдим, энди къартайдым,
амма инсафлыны ташлап кеткенлерини,
я да онынъ сою отьмек тилегенини ич корьмедим.
26 ^tКуньден-кунь о, мерамет эте ве борджкъа бере,
онынъ сою да адамларнынъ бахшышы олур.
Самек 27 ^uЯманлыкътан баш тартып, яхшылыкъ яп,
о вакъыт эбедий яшайджакъсынъ.
28 ^vРАББИ догърулыкъны севе,
О, Озь азизлерини ташлап кетмез.
Олар эбедий къорчаланаджакълар,
инсафсызларнынъ эвлятлары исе къырыладжакълар.
Айин 29Инсафлылар ер юзюнинъ саиплери олып,
анда эбедиен яшайджакъ.
Пе 30 ^wИнсафлынынъ агъзындан икмет чыкъа,
тили исе акъикъатны бильдире.
31 ^xАлласынынъ Къануны онынъ юрегинде,
онынъ аякълары ич сарсылмаз.
Саде 32 ^yЯрамай адамлар инсафлынынъ артындан бакъа,
оны ольдюрмек ичюн чаре къыдыра.
33Лякин РАББИ инсафлыны оларнынъ къолуна бермез,
суд вакътында оны къабаатламагъа ёл бермез.
Коф 34 ^zРАББИден джевап бекле, Онынъ ёлуны тут.
Сени ер юзюнинъ саиби япмакъ ичюн,
РАББИ сени юксельтеджек.
Ярамайлар къырылгъан заманны
сен озюнъ кореджексинъ.
Реш 35Амансыз ярамай адамны корьдим:
чокъ пытакълы ешиль терек киби,
онынъ тесири артты.
36Амма о, кечип кетти, ёкъ олды,
оны къыдырсам да, тапмайым.
Шин 37Саф юреклиге козь ташла,
догъру яшагъан адамгъа бакъ!
Бойле адамнынъ келеджеги – аманлыкъ.
38 ^aaАмма Къанунны бозгъанлар эписи ёкъ этиледжек,
ярамайларнынъ келеджеги кесиледжек.
Тав 39 ^abИнсафлыларнынъ къуртулышы РАББИден келир,
къайгъы заманында О, Озю оларгъа къале олур.
40 ^acРАББИ оларгъа ярдым этер, оларны къорчалар,
ярамайларнынъ къолундан оларны сакълар.
Олар РАББИге сыгъынгъанлары ичюн,
О, оларны къуртарыр.