‏ Psalms 37

Азап чеккеннинъ дувасы

1 ^aДавутнынъ зебуры. Хатырлав ичюн.
2 ^bЯ РАББИ, ачувынъда тазирлеме мени,
гъазабынъда мени джезалама!
3 ^cСенинъ окъларынъ манъа санчылды,
къолунъ устюме агъыр басып тюшти.
4 ^dГъазабынъдан беденимде сагълам ер къалмады,
гуналарымдан кемиклерим раат олмай.
5 ^eМеним яманлыкъларым башымдан ташты,
агъыр юк киби, устюме басты.
6Акъылсызлыгъымдан яраларым иринлеп сасымакъта.
7Белим букюлип, чёкип къалдым,
кунь бою гъам ичип юрем.
8Белим атеш ичинде,
беденимде сагълам ер къалмады.
9Такъаттан кесильдим ве пек эзильдим,
юрегим сызлагъанынен къычырам.
10Я Рабби! Бутюн тилеклерим Сенинъ алдынъда,
агълагъаным Сенден гизли дегиль.
11Юрегим къалтырай, къуветтен кесильдим,
козьлеримнинъ ярыгъы биле сёнди.
12 ^fМени джан-юректен севгенлер ве достларым
дердимден авлакъта туралар,
якъынларым да менден узакъта тура.
13Меним джанымны къыдыргъанлар къапкъан къоя;
манъа яманлыкъ истегенлер исе,
оледжегим акъкъында айтып,
эр кунь манъа къаршы фитне къуралар.
14 ^gМен исе, сагъыр киби, эшитмейим,
агъзыны ачалмагъан тильсизге ошайым.
15Мен агъзындан джевап чыкъмагъан,
эшитмеген адам олып къалдым.
16 ^hЯ РАББИ, умют этем Санъа,
я Рабби, Аллам, Сен джевап берерсинъ!
17Мен: «Душманларым тантана этмесин.
Аякъларым къалтырагъанда,
менден устюн олмасынлар», – дедим.
18Мен аз къалдым йыкъылмагъа,
къасеветим эр вакъыт огюмде.
19 ⁱМен къабаатымны бойнума алдым,
гунам ичюн пешман этем.
20Душманларым исе тири ве кучьке тола,
себепсиз мени кореджек козю олмагъанлар чокълаша.
21 ^jЯхшылыгъыма яманлыкъ япкъан адамлар,
мен яхшылыкъ япкъаным ичюн,
манъа къаршы чыкъалар.
22 ^kЯ РАББИ, мени ташлап кетме,
эй, Аллам, менден узакълашма!
23Манъа ярдымгъа ашыкъып кель,
я Рабби, меним Къуртарыджым!