Psalms 41
Къувулгъан адамнынъ къасевети ве теселлиси
1 aБаш чалгъыджы ичюн. Къорах огъулларынынъ маскили.2 bСыгъын чокъракъ сувларына ынтылгъаны киби,
джаным Санъа ынтыла, эй, Алла!
3Аллагъа, Тири Аллагъа джаным сувсады.
Не вакъыт келип, Алланынъ огюнде корюнеджегим?
4 c«Сенинъ Алланъ къайда?» – деп,
менден кунь бою сорагъанларда,
козьяшым гедже-куньдюз манъа отьмек олды.
5 dБу шей акълыма кельгенде, мен джанымны ачам.
Мен чокъ адамларнен берабер юрип,
Алланынъ Эвине бара эдим,
байрам эткен халкънен бирликте
къуванчнен къычырып, шукюр эте эдим.
6 eЭй, джаным, не ичюн бойле тюшкюнсинъ?
Не ичюн ичимде сыкъыласынъ?
Аллагъа умют багъла!
Мен Онъа даа шукюр этеджегим;
О, меним Къуртарыджым ве Аллам!
7 fДжаным ичимде къыйнала.
Шунынъ ичюн мен Иордан топрагъында,
Хермон ве Мицар дагъларында тургъанымда,
Сен акълыма келесинъ, эй, Аллам!
8Буюк теренликлер Сенинъ учансувларынънынъ сеслеринен
бири-бирини чагъыралар;
Сенинъ бутюн далгъаларынъ ве толкъунларынъ
меним башымдан кечтилер.
9 gКуньдюз РАББИ Озь буюк севгисини косьтерир,
гедже Онынъ йыры манъа келир,
меним дувам исе аятымнынъ Алласына кетер.
10 hМен таянгъан Къаягъа, Аллагъа айтаджагъым:
«Не ичюн Сен мени унуттынъ?
Не ичюн мен душманларымнынъ зулумы астында
гъам чекип юрем?»
11«Сенинъ Алланъ къайда?» – деп,
кунь бою душманларым сорай.
Олар мени масхара эткенде,
кемиклерим сынгъан киби ола.
12Эй, джаным, не ичюн бойле тюшкюнсинъ?
Не ичюн ичимде сыкъыласынъ?
Аллагъа умют багъла!
Мен Онъа даа шукюр этеджегим;
О, меним Къуртарыджым ве Аллам!
Copyright information for
CrhCTB