‏ Psalms 43

Алланынъ халкъыны къорчалагъан дува

1Баш чалгъыджы ичюн. Къорах огъулларынынъ маскили.
2 ^aЭй, Алла! Биз озь къулакъларымызнен эшиттик,
кечкен куньлерде, къадимий заманларда,
Сен япкъан аджайип ишлеринъ акъкъында
бабаларымыз бизге икяе этти.
3 ^bСен Озь къолунънен халкъларны къуваладынъ,
баба-деделеримизни исе оларнынъ топрагъында ерлештирдинъ.
Сен къабилелернинъ бойнуны урдынъ,
оларны яшагъан ерлеринден къувдынъ.
4 ^cБабаларымыз бу ерни озь къылычынен алмадылар,
къолларынынъ кучьлери оларны къуртармады,
тек Сенинъ онъ къолунъ, Сенинъ кучюнъ,
юзюнънинъ ярыгъы оларны къуртарды,
чюнки Сен олардан разы эдинъ.
5 ^dЭй, Алла, Сен – меним Падишам.
Якъупкъа къуртулыш бер!
6Сенинъ къуветинънен душманларымызны енъермиз,
бизге къаршы чыкъкъанларны
Сенинъ Адынъ иле аякъларымызнен эзермиз.
7 ^eМен озь яйыма ишанмам,
къылычым да мени къуртармаз.
8Сен бизни душманларымыздан къуртараджакъсынъ,
бизни кореджек козю олмагъанларны масхара этеджексинъ.
9Алланы эр кунь макътайджакъмыз,
Сенинъ Адынъны эбедиен шерефлейджекмиз.

Сэла
10 ^fАмма шимди Сен бизни ташлап, масхара эттинъ.
Сен энди бизим ордумызнынъ янында дженкке чыкъмайсынъ.
11 ^gСен бизни душманларымызнынъ огюнде къачмагъа меджбур эттинъ,
бизни кореджек козьлери олмагъанлар бизни талайлар.
12 ^hСен бизни, къойларны киби, ашамагъа бердинъ,
халкълар арасында бизни даркъаттынъ.
13Озь халкъынъны уджузгъа саттынъ,
оларны сатып, зенгин олмадынъ.
14 ⁱКъомшуларымызгъа бизим устюмизден кульмеге ёл бердинъ,
этрафтакилер бизим устюмизден кульди ве масхара этти.
15 ^jАдамлар бизим акъкъымызда шакъа этелер,
башкъа халкълар бизге бакъып, башыны саллай.
16Эр кунь масхаралыкъ козюм огюнде,
бетим утангъанымдан къапалы.
17Адамлар мени мыскъыллай ве акъарет этелер,
душман ве очь алыджы манъа къыйыш бакъалар.
18Буларнынъ эписи башымызгъа кельди,
амма биз Сени унутмадыкъ,
Сенинъ васиетинъни бозмадыкъ.
19Юрегимиз Сенден къайтмады,
табанларымыз Сенинъ ёлунъдан таймады.
20 ^kЛякин Сен бизни кийик копеклернинъ топрагъында тар-мар эттинъ,
олюм кольгесинен башымызны къапаттынъ.
21Эгер биз Алламызнынъ Адыны унутып,
башкъа бир аллагъа къолларымызны узаткъан олсакъ,
22 ^lАлла бунынъ эсабыны сорамаз эдими?
О, юрек сырларыны биле де!
23 ^mБизни эр кунь Сенинъ ичюн ольдюрелер,
къурбанлыкъ къойлар, деп саялар.
24 ⁿЯ Рабби, уян, не ичюн юкълайсынъ?
Тур да, бизни эбедиен ташлама!
25Не ичюн Сен юзюнъни сакълайсынъ,
бизим къайгъымызны ве азаплангъанымызны унутасынъ?
26Джанымыз топракъкъа тюшти,
беденлеримиз ерге япышып къалды.
27 ^oСен турып, бизге ярдым эт,
буюк севгинъ ичюн бизни сатын алып къуртар!