‏ Psalms 48

Зенгинликке умют багълагъан адам акъылсыздыр

1Баш чалгъыджы ичюн. Къорах огъулларынынъ зебуры.
2 ^aБунъа къулакъ асынъыз, эй, бутюн халкълар!
Эй, дюньяда яшагъанларнынъ эписи, буны эшитинъиз!
3Эй, бутюн яратылгъан инсаниет, акъайларнынъ огъуллары,
эм фукъаре, эм зенгин!
4Агъзымдан акъыллы сёзлер чыкъаджакъ,
юрегимнинъ тюшюнджелери бильги береджек.
5 ^bМен кинаели икяеге къулакъ асаджагъым,
сырымны сантырнен анълатаджагъым.
6Мени къувалагъанлар эр тарафтан мени сарып алгъанда,
белялы куньлерде не ичюн къоркъаджагъым?
7 ^cОлар озь кучюне ишанып,
байлыкъларынынъ чокълугъындан къопаялар.
8 ^dИч бир адам башкъасыны къуртаралмаз,
о ичюн Аллагъа бахшыш бермез.
9Джан сатын алгъан фияты буюктир,
адам бунъа ич иришип оламаз.
10 ^eИч бир адам эбедий яшамаз,
эр бир инсан мезар юзюни корер.
11 ^fЭр кес коре ки, атта акъыллы адамлар да олелер,
ахмакъ ве акъылсыз адамлар да гъайып олып,
озь байлыгъыны башкъаларгъа къалдыралар.
12Олар бойле тюшюнелер:
«Бизим эвлеримиз эбедийдир,
яшагъан еримиз несильден несильге кечеджек».
Олар яшагъан ерлерине озь адларыны берелер.
13 ^gАмма адамнынъ шурети кече,
о, айвангъа ошап, ёкъ олып кете.
14Оларнынъ бу ёлу – акъылсызлыкътыр,
амма оларнынъ артларындан кеткенлер
оларнынъ айткъанларыны къабул этер.

Сэла
15Олар, къойлар киби, олюлер дюньясына азырлангъан,
ве олюм оларнынъ чобаны оладжакъ.
Сабадан исе догъру яшагъанлар
оларгъа падишалыкъ этеджеклер.
Оларнынъ кучьлери ирип кетеджек,
олюлер дюньясы оларнынъ эви оладжакъ.
16 ^hАмма Алла меним джанымны
олюлер дюньясындан къуртараджакъ.
О, мытлакъа мени къабул этеджек.

Сэла
17Бириси зенгинлешкенде,
я да онынъ эвининъ шурети чокълашкъанда, къоркъма.
18 ⁱО ольгенде, озюнен ич бир шейни алып оламаз,
онынъ шурети онынъ артындан бармаз.
19Адам яшагъанда, озь джанына яхшы шейлер бере.
Эгер озюнъе яхшылыкъ япсанъ,
адамлар сени макътар.
20 ^jАмма бойле адам озь бабаларына къошулыр,
оларнен берабер ярыкъны ич бир вакъыт корьмез.
21 ^kСайгъылы, лякин акъылдан эксик адам
айванларгъа ошап, ёкъ олып кетер.