Psalms 50
Багъышлав дувасы
1Баш чалгъыджы ичюн. Давутнынъ зебуры.2 aДавут Бат-Шеванен яткъан сонъ, Натан пейгъамбер онынъ алдына кельген сонъ, Давут бу дуваны окъуды.
3 bЭй, Алла, Сенинъ буюк севгинъ ичюн
манъа мерамет эт!
Сынъырсыз шефкъатынъ ичюн
къанунсыз ишлеримни менден узакълаштыр!
4 cМени къабаатымдан бутюнлей ювып,
мени гуналарымдан темизле!
5 dКъанунсыз ишлер япкъанларымны мен анълайым,
япкъан гунам эр вакъыт козюм огюнде.
6 eМен Санъа, тек Санъа къаршы гуна яптым,
Сенинъ козюнъ огюнде яманлыкъ яптым.
Сенинъ сёзюнъ эр вакъыт догъру,
суд эткенде де Сен адалетлисинъ.
7 fМен къабаатлы олып догъдым,
анам меннен юкке къалгъанда, мен гуналы эдим.
8Сен юректеки акъикъатны корьмеге истейсинъ,
эм де ичиме бильги къоясынъ.
9 gЭзов отуны сувгъа батырып, устюме септир, темиз олайым,
мени юв, къардан да беяз олайым!
10Манъа къуванч ве шенъликни эшиттир,
Сен сындыргъан кемиклериме кене къуванч кирсин!
11Гуналарымдан юзь чевир,
бутюн къанунсыз ишлеримни менден узакълаштыр!
12 hЭй, Алла, ичимде темиз юрек ярат,
ичиме янъы, догъру рух къой.
13Мени Озюнъден терк этип ташлама,
Озь Мукъаддес Рухунъны менден алма.
14Къуртарувынънен кельген къуванчны манъа къайтарып бер.
Сени динълемеге истекни рухума берип, мени къуветлештир.
15Къанун бозгъанларгъа Сенинъ ёлларынъны огретеджегим,
ве гунакярлар Санъа къайтып келеджеклер.
16 iКъан тёккеним ичюн къабаатымны менден ал,
эй, Аллам, Къуртарыджым,
ве тилим Сенинъ догърулыгъынъ акъкъында
къуванчнен къычырыр.
17Я Рабби, дудакъларымны ач,
ве тилим Сени макътайджакъ!
18 jСен къурбан истемейсинъ, –
мен оны кетирир эдим.
Бутюнлей якъылгъан къурбандан да Сен разы олмайсынъ.
19 kАлла къабул эткен къурбан – тынч юректир.
Юваш ве пешман эткен юрекни Сен ред этмезсинъ, эй, Алла.
20 lОзь разылыгъынъа коре Сионгъа яхшылыкъ эт,
Ерусалимнинъ диварларыны котер!
21 mО вакъыт темиз къурбанларны,
атеште якъылгъан, бутюнлей якъылгъан къурбанларны
Сен къабул этеджексинъ.
О вакъыт Сенинъ къурбан еринъе
таналарны кетирип къояджакълар.
Copyright information for
CrhCTB