Psalms 52
Адамларнынъ акъылсызлыгъы акъкъында
1Баш чалгъыджы ичюн. Аль-махалат. Давутнынъ маскили.2 aАкъылсыз озь юрегинде: «Алла ёкъ», – деди.
Адамлар бозулды, игренч ишлер япып башлады.
Яхшылыкъ япкъан ич кимсе ёкъ.
3 bАлла инсан огъулларына коклерден бакъты,
«Алланы къыдыргъан бир акъыллы адам бармы?» – деди.
4 cАмма эписи ёлдан урулып,
бири-бирине ошап, бозулдылар.
Яхшылыкъ япкъан ич кимсе ёкъ,
бир адам биле ёкъ!
5 dКъанунсызлыкъ япкъанларнынъ акъылы етмезми?
Олар халкъымны, бир отьмек киби, ашагъанлар,
Алланы исе ич чагъырмагъанлар.
6 eОлар къоркъу олмагъан ерде къоркъаджакълар,
Алла санъа къаршы чыкъкъанларнынъ кемиклерини дагъытаджакъ.
Алла оларны ред эткени ичюн,
сен оларны масхара этеджексинъ.
7Исраильни къуртармакъ ичюн, ким Сион дагъындан келеджек?
Алла Озь халкъыны оларнынъ топрагъына къайтаргъанда,
Якъупнынъ сою къуванчнен къычыраджакъ,
Исраиль пек севинеджек!
Copyright information for
CrhCTB