‏ Psalms 58

Къуртулыш дувасы

1 ^aБаш чалгъыджы ичюн. Аль-ташхет. Давутнынъ миктамы. Шаул Давутны ольдюрмек ичюн, онынъ эвини козетмеге адам ёллагъан вакъытта язылгъан йыр.
2 ^bМени душманларымдан къуртар, эй, Аллам!
Манъа къаршы чыкъкъанлардан мени къорчала!
3Къанунны бозгъанлардан мени къуртар,
къан тёккен адамлардан мени къорчала.
4 ^cМына, олар сакъланып, джанымны алмагъа истейлер,
кучьлюлер манъа къаршы топлашалар,
мен исе джинает я да гуна япмадым,
я РАББИ.
5Мен къабаатсыз олсам да, манъа атылмагъа азырланалар.
Манъа ярдым этмек ичюн тур да, бакъ!
6Сен – Ордуларнынъ РАББИ-Таалясысынъ!
Исраильнинъ Алласы,
бутюн халкъларгъа джеза бермек ичюн тур,
имансыз хаинлернинъ ич бирисини аджыма!

Сэла
7 ^dАкъшам олар къайтып, копек киби, увулдайлар,
шеэрнинъ этрафыны айланып чыкъалар.
8Оларнынъ агъызлары яман сёзлер айтып токътамай,
дудакъларында исе къылычлар!
Олар: «Ким эшитир экен?» – дейлер.
9 ^eСен исе, я РАББИ,
оларнынъ устюнден куледжексинъ,
бутюн халкъларны масхара этеджексинъ.
10 ^fКъудрет – оларнынъ тарафындадыр.
Мен исе Сенинъ джевабынъны беклерим;
Аллам – меним сакълангъан ерим!
11 ^gМени севген Аллам меним огюмде кете,
О, манъа душманларыма къоркъусыз бакъмагъа ёл береджек.
12 ^hОларны ольдюрме, ёкъса халкъым унутыр.
Озь къудретинънен оларны дагъытып, оларны ашала,
я Рабби, бизим Къорчалайыджымыз!
13 ⁱАгъызларындан чыкъкъан гуналы сёзлер ичюн,
оларнынъ къаргъышлары ве яланлары ичюн,
олар озь макътанчакълыгъынен тутулып къалсынлар.
14Гъазапланып, оларны ёкъ эт,
олар даа ёкъ олсун деп, ёкъ эт оларны!
Олар бильсинлер: бутюн ер юзюнде
Алла Якъупкъа падишалыкъ эте.

Сэла
15 ^jАкъшам олар къайтып, копек киби, увулдасынлар,
шеэрнинъ этрафыны айланып чыкъсынлар.
16Айлана-айлана аш къыдырсынлар,
бутюн гедже ач олып отурсынлар.
17 ^kМен исе Сенинъ къудретинъ акъкъында йыр йырлайджагъым,
саба эртеден Сенинъ севгинъ акъкъында къуванчнен къычыраджагъым.
Сен мени къорчаладынъ,
белялы кунюмде меним сакълангъан ерим эдинъ.
18Эй, Къудретим, Санъа чалгъы чаладжагъым;
Алла – меним къалем, мени севген Аллам!