‏ Psalms 73

Халкъны къуртараджакъ дува

Асафнынъ маскили.

1 ^aЭй, Алла, Сен не ичюн бизни эбедий ред эттинъ?
Не ичюн гъазабынъ Озь отлагъынънынъ къойларына атеш олды?
2 ^bКъадимий замандан Сен сатын алгъан топлашувынъны акълынъда тут;
къысметинъ олгъан бу миллет ичюн Сен одеме бердинъ.
Булунгъан еринъ олгъан Сион дагъыны унутма!
3Асырларнен тургъан йыкътырмагъа бакъып, адым ат:
душман Азиз Ерде эр шейни харап этти.
4 ^cКорюшюв ерининъ ортасында душманларынъ авулдай,
бельги олсун деп, озь бельгилерини къойгъанлар.
5Олар санки сыкъ орманда балта котергени киби
арекет эттилер.
6 ^dОлар бутюн агъач оймаларыны
балталарнен ве буюк чёкючлернен ёкъ эттилер.
7Азиз Еринъни бус-бутюн якътылар,
Адынъ булунгъан Мескенни арамладылар.
8 ^eЮреклеринде: «Оларнынъ эписини бойсундыраджакъмыз!» – дедилер;
ер юзюнде Аллагъа ибадет эткен бутюн ерлерни кульге чевирдилер.
9 ^fБельгилеримизни энди корьмеймиз,
пейгъамбер де къалмады бизде,
не вакъыткъадже девам этеджегини ич кимсе бильмей.
10Эй, Алла, не вакъыткъадже душман Сени мыскъыллайджакъ?
Душман Адынъны эбедиен яманлайджакъмы?
11 ^gНе ичюн къолунъны, кучьлю онъ къолунъны узатмайсынъ?
Къойнунъдан къолунъны чыкъар да, ёкъ эт оларны.
12 ^hЭй, Алла, Сен къадимий замандан берли меним Падишамсынъ,
ернинъ ортасында къуртарув бересинъ!
13 ⁱСен къудретинънен денъизни ярдынъ,
аждерханынъ башларыны сувда парчаладынъ.
14Ливьятаннынъ ▼

▼Ливьятан – денъизде яшагъан пек буюк махлюкъ.

башларыны эздинъ,
оны сахранынъ сакинлерине аш эттинъ.
15 ^kСен янъы чокъракъ ве озенни ерни ярып яраттынъ,
буюк дерьяларны къуруттынъ.
16 ^lКуньдюз Сенинъ, гедже де Сенинъ.
Ай ве йылдызларны, кунешни де Сен ерлештирдинъ.
17 ^mЕр юзюнинъ бутюн сынъырларыны Сен къойдынъ,
яз ве къышны яраткъан Сенсинъ.
18Шуны унутма, я РАББИ:
душман Сени яманлады,
акъылсыз адамлар Адынъны сёгди.
19 ⁿГогерджининънинъ джаныны кийик айванларгъа берме,
заваллыларнынъ аятыны эбедиен унутма!
20 ^oСен берген васиетинъни козь огюне ал,
чюнки ернинъ къаранлыкъ кошелери
зулум эвлеринен толып кетти.
21Азап чеккенлер масхара олып къайтмасынлар,
заваллы ве фукъарелер кене Адынъны макътасынлар!
22Тур, эй, Алла, Озь давалы ишинъни къорчала!
Кунь бою акъылсызлар Сени яманлагъаныны хатырла!
23 ^pДушманларынъ къычыргъаныны унутма!
Санъа къаршы чыкъкъанларнынъ шаматасы токътамайып юкселе де!