Psalms 75
Алла енъер!
1Баш чалгъыджы ичюн. Телли чалгъы алетлеринде. Асафнынъ зебуры. Йыр.2Ехудада Алла беллидир,
Исраильде Онынъ Ады улу.
3 aОнынъ мескени – Салимде,
яшагъан ери – Сионда эди.
4 bШу ерде О, яйнынъ окъларыны сындырды,
къалкъаннен къылычны ве дженк силяларыны.
Сэла
5Сен нурлусынъ,
джанаварларнен толу дагълардан да салтанатлысынъ.
6 cКъавий юреклилер ав эти олды,
олюм юкъусына далды.
Бутюн акъайлардан ич бирисининъ къолунда кучь тапалмады.
7 dЭй, Якъупнынъ Алласы, Сенинъ азарламанъдан,
эм араба, эм ат сонъки юкъусына далды.
8 eСен къоркъунчлысынъ,
гъазабынъ кельгенде, къаршынъда ким тура билир?
9Коклерден къарарынъны бильдирдинъ,
ер къоркъып, сесини кести.
10Эй, Алла, Сен суд этмеге турдынъ,
ердеки бутюн заваллыларгъа къуртарувны кетирдинъ.
Сэла
11Инсанларнынъ гъазабы биле Санъа шурет догъура,
къалгъан гъазапны исе Сен ятыштырасынъ.
12 fРАББИ олгъан Алланъызгъа адакълар беринъиз,
сонъ оларны беджеринъиз!
Эй, Онынъ этрафында олгъанларнынъ эписи,
Къоркъунчлы Аллагъа бахшыш кетиринъиз!
13О, башлыкъларнынъ рухуны югенлей,
О, дюнья падишалары ичюн къоркъунчлыдыр!
Copyright information for
CrhCTB