‏ Psalms 77

Алла ве Онынъ халкъы

Асафнынъ маскили.

1Эй, халкъым, Къануныма дикъкъат эт,
агъзымдан чыкъкъан сёзлериме къулакъ асынъыз!
2 ^aАгъзымны ачып, кинаели икяе айтарым,
къадимий сырларны беян этерим:
3 ^bэшиткен ве бильгенлеримизни
ве бабаларымыз бизге айткъанларыны.
4 ^cОларны огъулларындан гизлемемиз,
келеджек несильге хабер этермиз
РАББИнинъ шурети ве буюк къудретини,
Онынъ косьтерген аджайип шейлерини.
5 ^dО, Якъуп ичюн шаатлыкъ берди,
Исраиль ичюн Къанунны къойды,
оны огъулларына огретмеге бабаларымызгъа буюрды.
6 ^eКеледжек несиль, догъуладжакъ балалар да оны бильсин,
олар исе озь вакътында огъулларына огретсин.
7Олар Аллагъа умют багъласынлар,
Алла яраткъан шейлерни унутмасынлар,
Онынъ эмирлерини беджерсинлер.
8 ^fБабаларымыз киби инат ве исьянджы,
юреклери вефалы олмагъан,
рухлары Аллагъа садыкъ олмагъан несиль олмасынлар.
9Окълар ве яйнен силялангъан Эфраимнинъ огъуллары
дженк кунюнде арткъа къайттылар.
10Олар Алла берген васиетни тутмадылар,
О ёллагъан Къанун ёлундан кетмеге истемедилер.
11 ^gОнынъ ишлерини эслеринден чыкъардылар,
косьтерген аджайип шейлерини унуттылар.
12 ^hМысыр топрагъында, Цоан тарласында,
оларнынъ бабалары огюнде
Алла аджайип шейлер косьтерген эди:
13 ⁱденъизни ярды, ортасындан оларны кечирди,
сувларны бир дивар киби къойды.
14 ^jКуньдюз булутнен оларны етекледи,
гедже исе атеш ярыгъынен ёл косьтере эди.
15 ^kОлар ичюн сахрада ташны ярып,
санки тюпсюз чокъракътан сув чыкъарып берди.
16О, къаядан сувларны акъыздырды,
олар озенлер киби акъып кетти.
17Амма олар Онъа къаршы гуна япмакъны девам этти,
къуру чёльде Юдже Алланы гъазапландырды.
18 ^lДжанлары истеген ашны талап этти,
юреклеринде Алланы сынап бакъты.
19Аллагъа къаршы айтып, шойле дедилер:
«Алла сахрада софра къурып олурмы?»
20Мына, О, къаяны урды, сувлар чыкъты,
ирмакълар акъып башлады.
«Озь халкъына отьмек де бере билирми,
этни де азырлап олурмы?»
21 ^mРАББИ буларны эшитип гъазапланды,
Якъупнынъ устюне атеш тюшти,
Исраильге къаршы ачувы котерильди.
22Олар Аллагъа инанмадылар,
Онынъ къуртарувына ишанмадылар.
23 ⁿО, юкъарыдаки булутларгъа эмир этти,
кок къапуларыны ачып ташлады.
24 ^oАшамакъ ичюн оларгъа манна ягъдырды,
оларгъа коктеки отьмекни берди.
25Адамлар мелеклернинъ отьмегини ашады;
О, оларгъа тойгъандже аш ёллады.
26Кок юзюнден О, шаркъ елини къозгъады,
къудретинен дженюп елини эстирди.
27 ^pОларнынъ устюне тоз киби этни ягъдырды,
денъиздеки къум къадар къанатлы къуш берди.
28Оларнынъ ордулары ортасында,
чадырлары этрафында буларны ягъдырды.
29 ^qОлар тоя-тоя ашадылар,
истегенлери къадар О, оларгъа берди.
30Амма мадделери даа кесильмеди,
ашлары даа агъызларында эди,
31 ^rАлланынъ ачувы башларына тюшти,
О, энъ кучьлюлерини ольдюрди,
Исраиль йигитлерини къырды.
32 ^sБунъа бакъмадан, олар кене гуна яптылар,
РАББИнинъ аджайип ишлерине инанмадылар.
33 ^tО, оларнынъ куньлерини бошлукъта,
омюр йылларыны дешет ичинде битирди.
34Алла оларны ольдюргенинен,
олар Оны къыдырып башлады;
олар къайтып, Аллагъа чапып кельди,
35 ^uАлла оларнынъ къаясы олгъаныны,
Юдже Алла оларнынъ Къуртарыджысы олгъаныны хатырладылар.
36 ^vАгъызларынен Онъа ялтакъландылар,
тиллеринен Онъа ялан айттылар.
37 ^wОнынъ алдында юреклери къыйыш эди,
буюргъан васиетине садыкъ олмадылар.
38 ^xАмма О, шефкъатлы эди,
гуналарыны багъышлап, оларны ёкъ этмеди.
Чокъ кере ачувыны олардан къайтарып,
бутюн гъазабыны бирден тёкмеди.
39 ^yОлар – кечип кеткен вуджуттыр,
чыкъып кетип, къайтып кельмез нефес киби олгъанлары
Онынъ акъылында эди.
40 ^zНе къадар сахрада Оны ачувландырдылар,
бош чёльде Оны акъарет эттилер!
41Олар Алланы къайта-къайта сынадылар,
Исраильнинъ Мукъаддес Алласынынъ джаныны агъырттылар.
42Олар Онынъ къудретини,
оларны зулумдан къуртаргъан кунюни хатырламадылар.
43 ^aaОнынъ Мысырда косьтерген бельгилерини,
Цоан тарласында косьтерген аджайип шейлерини эслеринден чыкъардылар.
44 ^abО, оларнынъ озенлерини къангъа айландырды,
олар ичмеге акъкъан сув тапалмадылар.
45 ^acОларны тишлесин деп, боджеклерни ёллады,
гъайып этсин деп, къыр бакъаларыны ёллады.
46 ^adОларнынъ ер махсулларыны сарынчкъаларгъа берди,
эмеклерининъ нетиджесини чегерткилерге берди.
47 ^aeЮзюмлерини бурчакънен урды,
инджир тереклерини бузнен гъайып этти.
48 ^afМалларынынъ башына бурчакъ ягъдырды,
сюрюлерини йылдырым атешине берди.
49 ^agОларгъа къаршы буюк гъазабы,
хышымы, ачувыны ве беляларны, –
бир талай яман эльчилерни ёллады.
50Алла Озь гъазабына ёл ачты,
оларнынъ джанларыны олюмден сакъламады,
ольдюриджи хасталыгъына джанларыны берди.
51 ^ahМысырда бутюн биринджи догъгъан балаларны ольдюрди,
Хамнынъ чадырларындаки бабаларнынъ гъурурыны ёкъ этти.
52 ^aiАлла Озь халкъыны къой-эчкилер киби айдап чыкъарды,
сахрада оларны сюрю киби етеклеп барды.
53 ^ajОларны сагъ-селямет юрсетти, бир шейден къоркъмадылар,
душманлары исе денъизге батты.
54 ^akОларны Озюнинъ мукъаддес топрагъына,
Онъ къолу алгъан бу дагъгъа кетирди.
55 ^alОзь алдындан башкъа халкъларны къувып чыкъарды,
Исраиль къабилелерине о ерни мирас этип берди,
бошалгъан чадырларда оларны ерлештирди.
56 ^amОлар исе але даа Юдже Алланы сынап,
Онынъ джаныны агъырттылар,
Онынъ шаатлыкъларыны сакъламадылар.
57 ^anБабалары киби артына къайтып, хаинлик яптылар,
окъу джоюлгъан яй киби бозукъ чыкътылар.
58 ^aoОзь ибадет тёпелеринде табынып,
Онынъ джаныны агъырттылар,
путларынен Оны куньлемеге меджбур эттилер.
59Алла буны эшитип, пек гъазапланды
ве Исраильни бутюнлей ред этти.
60 ^apАдамлар арасында Озю яшагъан чадырыны,
Шилода къургъан мескенини ташлап кетти.
61Къудретини эсирликке,
Озь гузеллигини душман къолуна берди.
62 ^aqОзь халкъыны къылычкъа теслим этти,
ачувыны Озь мирасындан чыкъарды.
63Оларнынъ йигитлерини атеш ютты,
къызларына никях йырларыны айтмадылар.
64 ^arРуханийлери къылычтан ольди,
тул апайлары агълап оламады.
65 ^asО вакъытта Рабби юкъудан киби турды,
шараптан енъильген батыр киби уянды.
66Душманларыны аркъасындан урды,
оларны эбедиен масхара этти.
67Алла Юсуфнынъ чадырыны ред этти,
Эфраимнинъ къабилесини сайламады.
68 ^atЛякин Ехуданынъ къабилесини сайлады,
Озю севген Сион дагъыны сечип алды.
69Озюнинъ мукъаддес мескенини коклер киби яратты,
ер юзю киби эбедиен ерлештирди,
70 ^auОзь къулу Давутны сайлады
ве оны къой къораларындан алып чыкъты.
71 ^avОны мал бакъкъанлардан алды,
Озь халкъы олгъан Якъупны,
Озь мирасы олгъан Исраильни бакъмагъа къойды.
72 ^awДавут исе темиз юрекнен оларгъа чобан олды,
беджерикли къолларынен оларгъа ёл косьтерди.