‏ Psalms 82

Душманларны магълюбиетке огъраткъан дува

1Йыр. Асафнынъ зебуры.
2 ^aЭй, Алла, индемей турма,
сесинъни кесме, арекетсиз къалма, эй, Алла!
3Мына, Сенинъ душманларынъ
шамата къопара,
Сенден нефрет эткенлер
баш котерелер.
4 ^bСенинъ халкъынъа къаршы
фитнеджилик япалар,
Сен къорчалагъан адамларынъа къаршы
акъыл танышалар.
5 ^c«Барайыкъ да, оларны халкълар сырасындан
ёкъ этейик,
Исраильнинъ ады башкъа хатырланмасын!» – дедилер.
6Олар бир юрек олып,
Санъа къаршы анълашма тиздилер.
7 ^dМына, Эдом ве Исмаилнинъ чадырлары,
Моав ве хагрийлилер,
8 ^eГивал, Аммон ве Амалек огъуллары,
фелестинлилер эм де Тир сакинлери.
9 ^fАшшур да оларгъа къошулып,
Лут огъулларына кучь берди.

Сэла
10 ^gСен Кишон вадийинде мидьянлыларгъа,
Сисера ве Явинге япкъанынъны оларгъа да яп.
11 ^hОлар Эн-Дорда ёкъ этильди,
топракъ ичюн кубре олды.
12 ⁱОрев ве Зеевге япкъанынъны
оларнынъ мырзаларына яп,
Зевах ве Цалмуннагъа не япкъан олсанъ,
оларнынъ бутюн башлыкъларына да шойле яп.
13«Алланынъ мескенлерини озюмизге
мульк этип алайыкъ!» – деген эди олар.
14 ^jЭй, Аллам, олар савурылгъан тоз киби,
ельнинъ огюне тюшкен тобан киби олсунлар.
15 ^kАтеште дагълар янгъаны киби,
алев къаяларны куйдюрген киби,
16 ^lСен боран чагъырып оларны айда,
башларына туфан кетирип, къоркъуз.
17Олар Сенинъ Адынъны къыдырсынлар деп,
бетлерини утанчнен къапла, я РАББИ!
18Олар эбедий масхара олып, къоркъугъа далсынлар,
резиль олып, ёкъ олсунлар!
19 ^mЭм де бильсинлер: Сенинъ Адынъ – РАББИ,
бутюн дюньяда ялынъыз Сен – Юдже Алласынъ!