‏ Psalms 93

Очь алгъан Алланы чагъырув

1 ^aЯ РАББИ, очь алыджы Алла!
Очь алыджы Алла, Озь нурунъда корюн!
2 ^bКотериль, ернинъ Къадысы,
кибирли адамларнынъ джезасыны бер!
3 ^cЯ РАББИ, не вакъыткъадже ярамайлар тантана этеджеклер?
4Олар ярамай сёзлерни къусалар,
акъсызлыкъ япкъанларнынъ эписи макътаналар,
5 ^dЯ РАББИ, Сенинъ халкъынъны хорлайлар,
Сенинъ мирасынъны азаплайлар,
6 ^eтул къадынны ве ят халкълардан олгъанларны ольдюрелер,
оксюзлернинъ джаныны алалар.
7 ^f«РАББИ корьмез!
Якъупнынъ Алласы бильмез», – дейлер.
8Эй, тентек адамлар, акъылынъызны топланъыз!
Не вакъыт акъылланаджакъсыз, ахмакълар?
9 ^gКъулакъны япкъан эшитмезми?
Козьни яраткъан корьмезми?
10 ^hХалкъларны низамгъа къойгъан джезаламазмы?
О, адамларгъа акъыл огрете!
11РАББИ инсанларнынъ фикирлерини,
оларнынъ бош олгъаныны биле.
12 ⁱНе де бахтлыдыр, Сен оны низамгъа чеккен
ве Сен онъа къанунны огреткен адам,
я РАББИ!
13Бойледже оны яман куньлерден сакълар,
ярамай адам ичюн чукъур къазылмагъандже.
14 ^jРАББИ Озь халкъыны ред этмез,
Озь мирасыны ташлап кетмез.
15Укюм этюв кене адалетли олур,
ве эписи догъру юреклилер онынъ пешинден бараджакъ.
16Яманлыкъ япкъан адамлар алдында ким мени къорчалар?
Акъсызлыкъ япкъанларнынъ огюнде ким мени акълар?
17 ^kЭгер РАББИ ярдымджым олмаса эди,
джаным чокътан сюкюнет дюньясында ятар эди.
18«Аягъым тайды», – дегенимде,
Сенинъ буюк севгинъ мени тутып турды,
я РАББИ!
19Ичимде къайгъыларым чокъ олгъанда,
Сенинъ теселлинъ юрегиме зевкъ берди.
20Олюм кетириджилернинъ тахты Сенинъ янынъда олурмы?
Олар низамнамелеринен беля кетирелер!
21 ^lОлар топнен инсафлы адамгъа къаршы уджюм этелер
ве къабаатсыз къанны ерге тёкелер.
22 ^mАмма РАББИ меним къалем олды,
Аллам – сыгъынагъымнынъ къаясы.
23Оларнынъ къанунсызлыгъыны озьлерининъ башларына кетирир,
озьлерининъ яманлыкъларынен оларны къырып ташлар;
РАББИ олгъан Алламыз оларны къырып ташлар.