‏ Psalms 101

Азап чеккеннинъ дувасы

1 ^aТакъаттан кесильген, къасеветини РАББИнинъ алдына тёккен заваллынынъ дувасы.
2Я РАББИ, дувамны эшит,
ярдым къычырувым Санъа етип барсын!
3Беля баскъан кунюмде Сен менден юзь чевирме,
сесиме къулакъ ас,
Сени чагъыргъан кунюмде манъа тез джевап бер!
4 ^bМына, куньлерим тютюн киби ёкъ олып кетти,
кемиклерим атеште янгъан къарачыкълар киби!
5 ^cЮрегим – къуругъан ве йыкъылгъан от киби,
отьмегимни ашамагъа биле унутам.
6Аджыныкълы инъильдегенимден,
терим кемигиме япышып къалды.
7 ^dМен сахра пугъусына,
харабеде къонгъан байкъушкъа ошайым.
8Козюме юкъу кирмей,
дам устюнде ялынъыз къалгъан къуш киби отурам.
9 ^eДушманларым эр кунь мени акъаретлейлер,
мени мыскъыллагъанлар меним адымнен лянет этелер.
10 ^fМен кульни отьмек киби ашайым,
ичимлигимни козьяшымнен къарыштырам.
11Сенинъ ачувынъ ве гъазабынъ ичюндир бу,
Сен мени котердинъ де, ерге урдынъ.
12 ^gКуньлерим – узангъан кольге киби,
мен от киби къурудым.
13 ^hАмма Сен эбедий олурсынъ, я РАББИ,
несиллернинъ эписи Сени акъылда тутар.
14 ⁱСен котерилип, Сионгъа шефкъат косьтереджексинъ,
чюнки онъа мерамет этмек вакъты кельди,
бельгиленген вакъыт кельди!
15 ^jОнынъ ташларыны къулларынъ севди,
онынъ тозуны биле аджыдылар.
16 ^kХалкълар РАББИнинъ Адындан,
бутюн дюнья падишалары – Сенинъ шуретинъден къоркъар.
17 ^lРАББИ Сионны янъыдан къураджакъ,
Озюнинъ Шуретинде корюнеджек.
18Заваллыларнынъ дувасына къулакъ асаджакъ,
ялварувларына хор бакъмайджакъ.
19 ^mБу шей келеджек несиль ичюн язылыр,
ве догъуладжакъ халкъ РАББИни макътар.
20 ⁿРАББИ мукъаддес юксекликтен ашагъы бакъты,
коклерден ер юзюни козетти,
21 ^oэсирлернинъ инъильтисини эшитти
ве олюм огъулларыны азат этти.
22 ^pСонъ Сионда РАББИнинъ Адыны олар бильдирсинлер,
Ерусалимде Оны макътасынлар
23халкълар берабер топланаджакъ вакъытта,
падишалыкълар РАББИге хызмет этеджек вакъытта.
24Ёлумда О, къуветимни алды,
куньлеримни О, къыскъартты.
25 ^q«Аллам, омрюмнинъ ярысында мени алма!» – дедим.
«Сенинъ йылларынъ да несиллерде девам этер!»
26 ^rБашында ерни Сен яраткъансынъ,
коклер де – Сенинъ къолларынънынъ ишидир.
27 ^sОлар ёкъ олып кетеджек,
амма Сен къаладжакъсынъ.
Бир урба киби, эписи ипранаджакъ;
кирли урба дайын, оларны денъиштиреджексинъ,
ве оларнынъ ерине башкъалары келеджек.
28 ^tСен Озюнъ исе денъишмейджексинъ,
Сенинъ йылларынъ ич битмейджек.
29 ^uКъулларынънынъ огъуллары яшайджакъ,
оларнынъ эвлятлары Сенинъ огюнъде сарсылмаз тураджакъ.