‏ Psalms 102

Алланы шуретлев

Давутнынъ йыры.

1 ^aЭй, джаным, РАББИни алгъышла!
Онынъ мукъаддес Адыны алгъышла,
эй, бутюн ичим!
2Эй, джаным, РАББИни алгъышла,
Онынъ бутюн эйиликлерини унутма!
3 ^bО, бутюн къанунсызлыкъларынъны багъышлай,
бутюн хасталыкъларынъны тедавийлей.
4 ^cАятынъны мезардан къуртара,
башынъа буюк севги ве шефкъат таджыны кийдире.
5 ^dСен истеген эйиликлернен сени тойдура,
яшлыгъынънынъ кучюни къартал кучю киби янъарта.
6РАББИ догъру арекет эте,
бутюн эзильгенлерни адалетли укюм эте.
7О, Озь ёлларыны Мусагъа,
Озь ишлерини Исраильнинъ огъулларына косьтерди.
8 ^eРАББИ мераметли ве шефкъатлыдыр!
О, пек сабырлы; севгиси пек буюк!
9 ^fО, эр вакъыт къабаатлап юрмез,
О, эр вакъыт хошнутсыз олмаз.
10 ^gГуналарымыз ичюн къазангъанымызгъа коре О, япмады,
бизге къабаатларымызгъа ярашкъан джеза бермеди.
11 ^hКок ерден не къадар юксек олса,
Ондан къоркъкъанларгъа буюк севгиси о къадар чокъ.
12 ⁱШаркъ гъарптан не къадар узакъта олса,
акъсызлыкъларымызны бизден о къадар узакълаштырды.
13 ^jБаба балаларына насыл шефкъатлы олса,
РАББИ Ондан къоркъкъанларгъа шефкъатлы ола.
14 ^kО, бизим теркибимизни биле,
топракъ олгъанымызны эсинде тута.
15 ^lИнсан куньлери бир откъа ошай,
тарла чечеги киби гуль ача.
16 ^mОнынъ устюнден ель эсип кече, ве о, ёкъ ола,
онынъ ери биле оны танымаз.
17 ⁿАмма РАББИнинъ севгиси эбедийдир,
Ондан къоркъкъанларгъа бутюн асырларда даркъала.
18 ^oОнынъ акъикъаты оларнынъ эвлятларына,
Онынъ васиетини туткъанларгъа
ве къаиделерини беджермеге ичюн унутмагъанларгъа даркъала.
19 ^pРАББИ тахтыны коклерде ерлештирген,
Онынъ падишалыгъы эр ерге акимдир.
20 ^qЭй, Онынъ мелеклери,
кучьлю батырлар,
Онынъ сёзюне къулакъ аскъан
ве Онынъ айткъанларыны беджергенлер,
РАББИни алгъышланъыз!
21Эй, сизлер, Онынъ бутюн ордулары,
ирадесини эда эткен хызметчилер,
РАББИни алгъышланъыз!
22Эй, РАББИнинъ бутюн ишлери,
падишалыгъынынъ эр бир еринде Оны алгъышланъыз!
Эй, меним джаным, РАББИни алгъышла!