Psalms 105
Исраильнинъ гуналары акъкъында
1 aЭльхамдюлилля!РАББИге шукюр этинъиз!
О, хайырлыдыр, ве эбедийдир Онынъ севгиси!
2РАББИнинъ къудретли ишлерини ким бутюнлей айта билир?
Онынъ макътавлы шейлерини ким толусынен беян эте билир?
3 bНе де бахтлыдыр адалетли укюм эткенлер,
эр вакъыт догъру япкъан адамлар!
4Я РАББИ, халкъынъа разылыгъынъны косьтерген вакъытта мени хатырла,
къуртарувынъны меним тарафыма ёлла!
5Сайлагъанларынънынъ аманлыгъыны корейим,
халкъынънен берабер къуванчнен шенъленейим,
Сенинъ мирасынънен макътанып юрейим!
6 cБиз бабаларымызнен гуна яптыкъ,
ёлдан урулдыкъ, бозукълыкъ яптыкъ.
7 dБабаларымыз Мысырда олгъанда,
Сенинъ аджайип шейлеринъни анъламадылар,
чокътан-чокъ мераметли ишлеринъни хатырламадылар,
денъиз янында, Къызыл денъиз янында исьян котердилер.
8 eРАББИ исе, къудретимни косьтермейим деп,
Озь Ады ичюн оларны къуртарды.
9 fО, Къызыл денъизге къатты сёз айтты,
ве денъиз къуруды.
Санки сахранынъ ортасындан кечкенлери киби,
оларны терен денъиз тюбюнден кечирди.
10 gНефрет эткеннинъ къолундан оларны къуртарды,
душман панджасындан сатын алды.
11 hДушманларыны сувлар басты,
олардан ич бириси къалмады.
12 iО вакъыт инандылар Онынъ сёзлерине,
макътав йырыны айттылар Онъа.
13 jАмма тезден унуттылар Онынъ ишлерини,
Онынъ огютлерини беклемедилер.
14 kСахрада нефислерине бойсундылар,
адам олмагъан ерлерде Алланы сынадылар.
15 lО, оларгъа истегенлерини берди,
амма джанларына ольдюриджи хасталыкъны ёллады.
16 mОрдуда Мусаны пахылладылар,
ве Харунны, РАББИнинъ азизини.
17 nЕр ярылып, Датанны ютты,
Авирамнынъ тарафдарларыны къаплап алды.
18 oТоплангъан ерлеринде атеш янды,
ярамайларны якъып ташлады.
19 pХорев дагъында бузавны ясадылар,
иритильген маденден япылгъан путкъа табындылар.
20 qШунынънен шуретли Алласыны
от ашагъан огюз путуна денъиштирдилер.
21 rМысырда буюк ишлер япкъан,
Къуртарыджылары олгъан Алланы унуттылар.
22Хам топрагъында аджайип шейлер япкъан,
Къызыл денъизде къоркъунчлы ишлер косьтерген
Алланы унуттылар.
23 sАлла оларны ёкъ этмеге ниетленди.
Лякин Алла сайлагъан Муса
Онынъ огюнде арада турды,
гъазабыны къайтарды,
ве О, оларны ёкъ этмеди.
24 tСонъ олар гузель ерни хор эттилер,
инанмай эдилер Алланынъ сёзюне.
25Чадырларында мырылдап отурдылар,
бойсунмадылар РАББИнинъ сесине.
26О вакъыт Алла оларгъа къаршы къол котерди,
сахрада оларны ёкъ этмеге истеди.
27 uТюрлю топракъларда оларны даркъатып,
оларнынъ эвлятларыны халкълар арасында ёкъ этмеге истеди.
28 vОлар Баал-Пеор адлы путкъа япыштылар,
олюлер ичюн берильген къурбанларны ашадылар.
29Япкъан ишлеринен Алланы ачувландырдылар,
сонъ ольдюриджи маразгъа огърадылар.
30 wПинехас турды да, арагъа чыкъты,
ве ольдюриджи мараз кесильди.
31 xБу иш онъа инсафлыкъ деп сайылды,
несильден несильге эбедий олды.
32 yМерива сувлары янында Алланы гъазапландырдылар,
олар ичюн Мусанынъ башына беля кельди.
33 zОлар онынъ джаныны агъырткъанларында,
Муса тюшюнмейип лаф къачырды.
34 aaРАББИ оларгъа эмир эткен эди,
олар исе къырмадылар ят халкъларны,
35 abамма башкъа халкъларнен къарышып,
оларнынъ ишлерини огрендилер,
36 acоларнынъ путларына табындылар,
путлар исе тузакъ олды оларгъа.
37 adОзь огъулларынен къызларыны ольдюрип,
джинлерге къурбан кетирдилер.
38 aeХанаан путларына къурбан кетирип,
огъул ве къызларынынъ гунасыз къаныны тёктилер,
топракъ исе къангъа батып арам олды.
39Олар япкъан ишлери ичюн арам олдылар,
арекетлеринен ороспулыкъ япкъан киби олдылар.
40О вакъыт РАББИ Озь халкъына гъазапланды,
Озюнинъ мирасындан нефретленди.
41 afОларны башкъа халкъларнынъ къолуна берди,
олардан нефрет эткенлер оларгъа эфендилик этип башлады.
42 agДушманларындан олар зулум чектилер,
оларнынъ къолу астында баш эгип юрдилер.
43 ahЧокъ керелер РАББИ оларны къуртаргъан эди,
олар исе даа инатлана эдилер,
ве озь яманлыкълары ичюн алчакълаштырылдылар.
44 aiЛякин О, оларнынъ агъыр алларына итибар этти,
оларнынъ ярдымгъа чагъырувыны эшитти.
45 ajОларгъа берген васиетини хатырлады,
буюк севгиси ичюн оларны аджыды.
46 akОларны эсир алгъан эписининъ юрегинде
оларгъа нисбетен шефкъат догъурды.
47РАББИ олгъан Алламыз, бизни къуртар!
Халкълар арасындан бизни топлап ал,
Сенинъ мукъаддес Адынъны шуретлейик,
Сенинъ шуретли ишлеринънен макътанайыкъ!
48 alРАББИ олгъан Исраильнинъ Алласына
эбедиен, бутюн асырларда бинъ шукюрлер олсун!
Бутюн халкъ исе: «Амин» – десин!
Эльхамдюлилля!
Copyright information for
CrhCTB