Psalms 11
Ярдым дувасы
1Баш чалгъыджы ичюн. Аль-хашшеминит. Давутнынъ зебуры.2 aКъуртар мени, я РАББИ!
Иманлылар гъайып олды,
адам огъулларынынъ арасында ишанчлылар къалмады.
3 bЭр кес бир-бирине ялан айта,
дудакълары ялтакъланалар,
юреклери экиюзьлюдир.
4Эр бир ялтакълангъан агъызны,
буюк лафлар эткен тиллерни
РАББИ къырып ташласын!
5«Биз тилимизнен енъеджекмиз,
дудакъларымыз бизнен!
Ким бизге эфендилик япар?» – дей олар.
6«Фукъарелер къыйналалар,
ёкъсуллар агълайлар.
Шунынъ ичюн шимди тураджагъым, – дей РАББИ.
– Олар тузакъкъа тюшюреджек адамны
хавфсыз ерде сакълайджагъым».
7 cРАББИнинъ сёзлери – темиз сёзлердир.
Олар топракътан алынып, оджакъта темизленген,
еди кере иритильген кумюшке ошай.
8Сен, я РАББИ, оларны сакъларсынъ;
Сен эр вакъыт оларны бойле адамлардан къорчаларсынъ.
9Адам огъулларынынъ арасында
ярамайлыкъ юкъарыгъа котерильгенде,
инсафсызлар эр ерде юрелер.
Copyright information for
CrhCTB