Psa 118 | CrhCTB | STEP | Алеф Не де бахтлыдыр къабаатсыз ёлунен, РАББИнинъ Къанунынен юрген адамлар!

1 ^bНе де бахтлыдыр къабаатсыз ёлунен,
РАББИнинъ Къанунынен юрген адамлар!
2 Не де бахтлыдыр РАББИнинъ шаатлыкъларыны сакълап,
бутюн юрекнен Алланы къыдыргъанлар!
3 ^cОлар къанунсыз ишни япмайып,
РАББИнинъ ёлларындан юрелер.
4 Сен къаиделеринъни джиддий сакъламагъа
Озюнъ бизге буюрдынъ.
5 Ах, низамнамелеринъни тутмагъа
меним ёлларым баргъан олса эди!
6 ^dО вакъытта утанмаз эдим,
бутюн эмирлеринъе бакъып.
7 Догъру юрекнен Санъа шукюр этерим,
Сенинъ адиль къарарларынъны огренип.
8 ^eСенинъ низамнамелеринъни тутарым,
мени бутюнлей ташлап кетме!
Беит 9 ^fЙигит озь ёлуны насыл этип темиз сакълар?
Сенинъ Сёзюнъни тутса, бойле олур.
10 ^gМен Сени бутюн юрегимнен къыдырам,
эмирлеринъден узакълашмагъа ёл берме.
11 ^hСанъа къаршы гуна япмамакъ ичюн,
Сёзюнъни юрегимде сакъладым.
12 ⁱРАББИге бинъ шукюрлер олсун!
Низамнамелеринъни манъа огрет.
13 ^jАгъзынъдан чыкъкъан бутюн къарарларны
озь тилимнен хабер этем.
14 ^kСенинъ шаатлыкъларынъ акъкъында
буюк байлыкъ акъкъында киби къуванам.
15 ^lКъаиделеринъни теренден тюшюнирим,
Сенинъ ёлларынъа тюшюнип бакъарым.
16 Къанунларынъдан зевкъ тапам,
Сенинъ Сёзюнъни ич унутмам.
Гимел 17 Къулунъа эйилик яп,
сонъ мен яшап, Сёзюнъни тутарым.
18 Козьлеримни ачып ташла,
ве мен Къанунынънынъ аджайип шейлерини корерим.
19 ^mМен бу дюньяда ят адамым,
эмирлеринъни менден сакълама.
20 ⁿКъарарларынъны эр вакъыт арзу этем,
бундан джанымнынъ алы ёкъ.
21 ^oКибирли адамларны юзьлединъ,
эмирлеринъден четлешкенлерге лянет.
22 Масхаралыкъ ве акъаретни менден узакълаштыр,
чюнки мен шаатлыкъларынъны сакълап туттым.
23 ^pБашлыкълар отурып, манъа къаршы анълаша,
къулунъ исе низамнамелеринъни тюшюнип бакъа.
24 Сенинъ шаатлыкъларынъ манъа зевкъ бере,
олар манъа акъыл огрете.
Далет 25 Джаным топракъкъа япышып къалгъан,
Озь Сёзюнънен мени джанландыр!
26 Ёлларымны Санъа ачкъанымда, мени эшиттинъ,
низамнамелеринъни манъа огрет!
27 Къаиделеринънинъ ёлуны манъа анълат,
аджайип шейлеринъни теренден тюшюнейим!
28 ^qДжаным кедерден иримекте,
Сёзюнънен мени къуветлендир!
29 Яланджылыкъ ёлуны менден узакълаштыр,
Къанунынъны манъа багъышла!
30 Мен акъикъат ёлуны сайладым,
къарарларынъны алдыма къойдым.
31 Шаатлыкъларынъа къатты япыштым,
мени масхара этме, я РАББИ!
32 Сен манъа чокъ шейлерни анълаткъанынъ ичюн,
эмирлеринъ ёлундан чапып кетерим.
Хе 33 Я РАББИ, низамнамелеринънинъ ёлуны манъа огрет,
оларны сонъунадже тутып беджеририм.
34 ^rМанъа анълав бер,
ве мен Къанунынъны беджеририм,
оны бутюн юрегимнен тутарым.
35 Мени эмирлеринъ ёлуна къой,
чюнки шуны мен истедим.
36 ^sЮрегимни акъсыз къазанчкъа дегиль,
Озь шаатлыкъларынъа чевир.
37 Козьлеримни бош шейлерден бур,
Озь ёлларынъда мени джанландыр.
38 Сенден къоркъкъанларгъа берген Сёзюнъни
Озь къулунъ ичюн де ерине кетир!
39 Мен къоркъкъан акъаретни менден узакълаштыр,
чюнки Сенинъ къарарларынъ хайырлыдыр.
40 Сенинъ къаиделеринъни истедим,
Озь адалетинънен джанландыр мени.
Вав 41 Берген Сёзюнъе коре, я РАББИ,
буюк севгинъ ве къуртарувынъ манъа кельсин!
42 ^tО вакъыт мени акъаретлегенлерге джевап берерим,
чюнки Сенинъ Сёзюнъе ишандым.
43 Агъзымдан акъикъат сёзлерини бутюнлей тартып алма,
мен Сенинъ къарарларынъа умют багъладым.
44 Сенинъ Къанунынъны мен эр вакъыт,
даима ве эбедиен сакъларым.
45 Юрегим сербест олып юрерим,
чюнки къаиделеринъни къыдырдым.
46 ^uПадишалар огюнде шаатлыкъларынъ акъкъында айтарым,
эм де ич утанмам.
47 ^vМен Сенинъ эмирлеринъден зевкъ алырым,
чюнки оларны севдим.
48 Къолларымны севген эмирлеринъе узатырым,
низамнамелеринъни теренден тюшюнирим.
Зайин 49 Къулунъа берген сёзюнъни хатырла,
бунынънен умют бердинъ манъа!
50 Беля кельген куньде о манъа теселлидир,
чюнки Сёзюнъ мени джанландырды.
51 ^wКъопайлар мени чокъ масхара эттилер,
мен исе къайтмадым Къанунынъдан.
52 Я РАББИ, Сенинъ къадимий къарарларынъны ерине кетирдим
ве теселли таптым.
53 ^xКъанунынъны ташлап кеткен яманларны корьгенимде,
мени ачув баса.
54 ^yЭр бир яшагъан еримде
низамнамелеринъ акъкъында йырладым.
55 Я РАББИ, гедже Сенинъ Адынъны хатырлап,
Къанунынъны сакълап туттым.
56 О меним ичим олды,
акъикъатен къаиделеринъни сакъладым.
Хет 57 ^z«РАББИ – меним къысметим», – дедим.
Айткъанларынъны тутмагъа мен сёз бердим.
58 Мен бутюн юрегимнен Санъа ялвардым:
Сёзюнъе коре манъа мерамет эт.
59 Мен ёлларымны тюшюнип бакътым,
аякъларымны шаатлыкъларынънынъ тарафына бурдым.
60 Эмирлеринъни тутмакъ ичюн ашыкътым,
бу ёлда мен ич токътамадым.
61 ^aaЯрамайларнынъ тузакълары мени сарып алды,
амма Сенинъ Къанунынъны унутмадым.
62 ^abАдалетли къарарларынъ ичюн шукюр этейим деп,
мен яры геджеде де турарым.
63 Мен Сенден къоркъкъанларнынъ
ве къаиделеринъни туткъанларнынъ эписине дост олурым.
64 ^acЯ РАББИ, Сенинъ буюк севгинънен ер юзю толу,
манъа низамнамелеринъни огрет!
Тет 65 Я РАББИ, Озь Сёзюнъе коре,
къулунъа яхшылыкъ эттинъ!
66 Манъа сагълам дуйгъу ве бильги бер,
чюнки мен эмирлеринъе инандым.
67 Азап чекмезден эвель янълыша эдим,
энди исе Сёзюнъни тутам.
68 ^adСен яхшысынъ, яхшылыкъ япасынъ,
низамнамелеринъни манъа огрет!
69 ^aeКъопайлар артымдан ялан айта,
мен исе бутюн юрегимнен къаиделеринъни тутарым.
70 ^afОларнынъ юреклерини ич ягъы баскъан,
мен исе Сенинъ Къанунынъдан зевкъ тапам.
71 ^agАзап чеккеним манъа яхшы олды,
чюнки низамнамелеринъни огренип алдым.
72 ^ahБинълер алтын ве кумюштен яхшы
Сенинъ агъзынъдан чыкъкъан Къанунынъ.
Ёд 73 ^aiСенинъ къолларынъ мени яраткъан, ясагъан,
эмирлеринъни огренмек ичюн манъа анълав бер!
74 ^ajСенден къоркъкъанлар мени корип севинир,
чюнки Сенинъ Сёзюнъе умют багъладым.
75 Я РАББИ, къарарларынъ адалетли олгъаныны билем,
садакъатынъ ичюн мени къыйнадынъ.
76 Къулунъа берген Сёзюнъе коре,
буюк севгинъ манъа теселли олсун!
77 Шефкъатынъ манъа кельсин, ве мен яшарым,
чюнки Сенинъ Къанунынъдан зевкъ алам.
78 Къопайлар масхара олсун,
чюнки олар ялан айтып, мени яманлады.
Мен исе Сенинъ къаиделеринъни тюшюнирим.
79 Сенден къоркъкъан ве шаатлыкъларынъны бильгенлер
меним тарафыма айлансын.
80 ^akНизамнамелеринъ ёлунда юрегимни темиз тутайым,
сонъ Мен масхара олмам.
Каф 81 Къуртарувынъны беклеп, джаным иримекте,
Сёзюнъе мен умют багъладым.
82 ^alСёзюнъни беклеп, козьлерим зайыфлаша;
«Не вакъыт меним гонълюмни алырсынъ?» – дейим.
83 Тютюн ичинде къуругъан мешин торбасына ошайым,
лякин Сенинъ низамнамелеринъни унутмадым.
84 ^amКъулунънынъ омюри не къадар олур?
Манъа зулум эткенлерни не вакъыт укюм этеджексинъ?
85 ^anКъанунынъа къаршы чыкъып,
къопайлар манъа чукъур къаздылар.
86 Бутюн Сенинъ эмирлеринъ ишанчлыдыр,
лякин адамлар манъа адалетсиз зулум этелер;
манъа ярдым эт!
87 Мени ер юзюнден ёкъ этмелерине аз къалды,
амма мен къаиделеринъни ташлап кетмедим.
88 Буюк севгинъ ичюн мени джанландыр,
Сенинъ агъзынъдан чыкъкъан шаатлыкъларынъны сакълап тутарым!
Ламет 89 ^aoЯ РАББИ, Сенинъ Сёзюнъ эбедийдир,
о, коклерде къатты ерлештирильген.
90 ^apНесильден несильге Сен ишанчлысынъ,
Сен ерни къавий пекиттинъ, ве о, тура.
91 ^aqКъарарларынъа коре бу куньге къадар эр шей тура,
чюнки Сенинъ къулларынъдыр бутюн барлыкъ.
92 Къанунынъдан зевкъ тапмагъан олсам,
мен белядан ёкъ олып кетер эдим.
93 Къаиделеринъни эбедий унутмам,
чюнки оларнен мени джанландырасынъ.
94 Мен Сенинъки олам, азат эт мени,
чюнки Сенинъ къаиделеринъни къыдырам.
95 Ярамайлар мени ёкъ этмек ичюн сакъланып туралар,
мен исе шаатлыкъларынъны юрегимнен тюшюнип бакъарым.
96 Эр бир мукеммель шейнинъ сонъуны корьдим,
Сенинъ эмиринънинъ сонъу исе ёкъ.
Мим 97 Не къадар севем Къанунынъны,
о, бутюн кунь меним фикримде.
98 ^arЭмирлеринъ мени душманларымдан икметли япты,
чюнки олар эр вакъыт меннен.
99 Бутюн оджаларымдан акъыллы олдым,
чюнки Сенинъ шаатлыкъларынъны тюшюнем.
100 ^asАкъсакъаллардан да зияде анълайым,
чюнки Сенинъ къаиделеринъни сакълап тутам.
101 ^atСенинъ сёзюнъни тутмакъ ичюн,
аякъларымны бутюн яман ёллардан сакъладым.
102 Сенинъ къарарларынъдан юзь чевирмедим,
чюнки Сен Озюнъ мени огреттинъ.
103 ^auСёзлеринъ тамагъыма татлы келе,
агъзыма олар балдан гузель корюне!
104 Къаиделеринъден акъыл огренгеним ичюн,
эр бир ялан ёлундан нефретленем.
Нун 105 ^avСенинъ Сёзюнъ адымларым ичюн лампаттыр,
ёлума нур сачкъан ярыкътыр.
106 ^awАдалетли къарарларынъны беджерип тутмагъа ант эттим,
эм антымны тутаджагъым.
107 Мен пек чокъ азап чектим, я РАББИ,
Сёзюнъе коре мени джанландыр.
108 Я РАББИ, тилимдеки алгъышлав бахшышларындан разы ол,
манъа къарарларынъны огрет!
109 Джаным эр вакъыт хавфлы алда,
Сенинъ Къанунынъны исе унутмадым.
110 ^axЯрамайлар манъа тузакъ къойдылар,
амма мен Сенинъ къаиделеринъден юзь чевирмедим.
111 ^ayШаатлыкъларынъны эбедий мирас этип алдым,
олар юрегиме къуванч берелер.
112 Низамнамелеринъе юрегимни бердим,
омюр бою, сонъунадже оларны беджеририм.
Самек 113 Фикирлери экиге болюнген адамлардан нефретленем,
Сенинъ Къанунынъны исе севем.
114 ^azСыгъынагъым ве къалкъаным Сенсинъ,
Сенинъ Сёзюнъе умют багъладым.
115 ^baЭй, Къанун бозгъанлар, менден узакълашынъыз,
ве мен Алламнынъ эмирлерини беджерип юрерим.
116 Сёзюнъе коре манъа аркъа ол,
ве мен яшап къалырым,
умютимни масхара этме!
117 Манъа ярдым эт, ве мен къуртулырым,
низамнамелеринъе дикъкъатнен бакъарым!
118 Низамнамелеринъден чыкъкъан адамларнынъ эписини Сен ред этесинъ,
чюнки оларнынъ яланджы арекетлери бошуна!
119 Ер юзюндеки бутюн ярамайларны Сен куль киби чыкъарып ташлайсынъ,
шунынъ ичюн шаатлыкъларынъны севдим.
120 ^bbСенден къоркъкъанымдан вуджудым титрей,
къарарларынъдан мен пек къоркъам.
Айин 121 Мен догъру ве адалетли арекет эттим;
манъа зулум эткенлернинъ къолуна берме мени!
122 ^bcОзь къулунъны онынъ хайыры ичюн къорчала,
къопайлар манъа зулум этмесин!
123 ^bdСенинъ къуртарувынъны
ве адалетли укюминъни беклеп, козьлерим ёрулды.
124 Къулунъа буюк севгинъе коре арекет эт,
манъа низамнамелеринъни огрет!
125 Мен Сенинъ къулунъ олам,
манъа акъыл бер, сонъ шаатлыкъларынъны анъларым!
126 РАББИнинъ иш япмакъ вакъты кельди,
чюнки Сенинъ Къанунынъны бозып ташладылар!
127 ^beМен эмирлеринъни алтындан да,
энъ темиз алтындан зияде севем.
128 Бутюн къаиделеринъни догъру саям,
эр бир ялан ёлундан исе нефрет этем.
Пе 129 Сенинъ шаатлыкъларынъ аджайиптир,
шунынъ ичюн джаным оларны беджере.
130 ^bfСёзюнъ ачылгъанда, ярыкъ сача,
адий адамларгъа анълав бере.
131 ^bgАгъзымны ачып нефес алам,
Сенинъ эмирлеринъни беклейим!
132 Адынъны севгенлерге япкъанынъ киби,
манъа да бакъып, эйилик яп манъа!
133 Сёзюнъде адымларымны пекит,
ич бир беля манъа укюмдар олмасын!
134 Инсанларнынъ зулумындан мени сатын алып къуртар,
къаиделеринъни сакълап тутарым!
135 ^bhКъулунъа юзюнънинъ ярыгъыны косьтер,
низамнамелеринъни огрет манъа!
136 ^biКозьяшымны озен киби акъызам,
чюнки адамлар Къанунынъны бозгъанлар.
Саде 137 Сен адалетлисинъ, я РАББИ,
къарарларынъ исе догърудыр.
138 Сен берген шаатлыкъларынъ адалетли
ве пек ишанчлыдыр.
139 Куньджюлигим мени чекиштире,
чюнки душманларым Сёзюнъни унуттылар!
140 ^bjСенинъ Сёзюнъ пек темиздир,
къулунъ оны севди!
141 Мен кичиким, сайгъылы дегилим,
лякин къаиделеринъни унутмадым.
142 ^bkСенинъ адалетинъ эбедиен адалетлидир,
Къанунынъ да даимийдир.
143 Азап ве сыкъынты манъа кельди,
эмирлеринъде исе зевкъ таптым.
144 Шаатлыкъларынъ эбедиен адалетлидир;
манъа акъыл бер, ве мен яшарым.
Коф 145 Бутюн юрегимнен ялвардым:
«Манъа джевап бер, я РАББИ,
Сенинъ низамнамелеринъни тутарым».
146 Сени чагъырдым: «Къуртар мени,
шаатлыкъларынъны сакъларым!»
147 ^blСаба эрте турып, ярдым истейим,
Сенинъ Сёзюнъе умют багъладым.
148 Сёзюнъни тюшюнмек ичюн,
гедже козьлериме юкъу бермейим.
149 Буюк севгинъ ичюн сесимни эшит, я РАББИ,
къарарларынъа коре мени джанландыр!
150 Бозукъ ниетли адамлар манъа якъынлашты,
олар Сенинъ Къанунынъдан узакътадыр.
151 ^bmСен пек якъынсынъ, я РАББИ,
бутюн эмирлеринъ исе – ишанчлыдыр.
152 Чокътан берли бильдим ки,
Сен шаатлыкъларынъны эбедиен темеллештирдинъ.
Реш 153 Заваллы алыма бакъып, мени къуртар,
чюнки Сенинъ Къанунынъны унутмадым!
154 ^bnДавамда меним тарафымны тут, мени сатын алып къорчала,
Сёзюнъе коре мени джанландыр!
155 Къуртулыш ярамай адамлардан узакътадыр,
чюнки олар низамнамелеринъни къыдырмайлар.
156 ^boСенинъ шефкъатынъ буюктир, я РАББИ,
къарарларынъа коре мени джанландыр!
157 ^bpМени къувалагъанлар ве душманларым чокъ,
амма Сенинъ шаатлыкъларынъдан мен юзь чевирмем.
158 ^bqИмансыз адамларны корьдим ве олардан игрендим,
чюнки олар эмирлеринъни тутмадылар.
159 Бакъ, къаиделеринъни мен не къадар севем!
Я РАББИ, буюк севгинъ ичюн мени джанландыр!
160 ^brСенинъ Сёзюнънинъ темели акъикъаттыр,
эр бир адалетли къарарынъ эбедийдир.
Син, Шин 161 ^bsБашлыкълар себепсиз мени къуваладылар,
юрегиме исе Сенинъ Сёзюнъ къоркъу бере.
162 ^btМен Сенинъ Сёзюнъ ичюн,
буюк келир тапкъан киби къуванам.
163 Яланджылыкътан нефретленип игренем,
лякин Сенинъ Къанунынъны севем.
164 Адалетли къарарларынъ ичюн
эр кунь еди кере Сени алгъышлайым.
165 Къанунынъны севгенлер буюк аманлыкъта яшайлар,
оларнынъ огюнде маниа ёкъ.
166 ^buКъуртарувынъа умют багъладым, я РАББИ,
Сенинъ эмирлеринъни беджерем.
167 Шаатлыкъларынъны юрегимде сакълап юрем,
оларны чокъ севем.
168 ^bvКъаиде ве шаатлыкъларынъны сакълап тутам,
чюнки бутюн ёлларым Сенинъ алдынъда.
Тав 169 Агълавым Санъа барып етсин, я РАББИ,
Сёзюнънен манъа акъыл бер!
170 Ялваргъаным Санъа барып етсин,
Сёзюнъе коре мени къуртар!
171 Низамнамелеринъни манъа огреткенинъ ичюн,
дудакъларым Санъа макътавлар айтар!
172 Тилим сёзлеринъни йырлар,
чюнки бутюн эмирлеринъ адалетлидир!
173 Къолунъ манъа ярдым этсин,
чюнки мен къаиделеринъни сайладым.
174 Къуртарувынъны чокъ беклейим, я РАББИ,
Къанунынъда мен зевкъ тапам.
175 Джаным яшасын, Сени макътасын,
къарарларынъ манъа ярдым этсин!
176 ^bwДжоюлгъан къой киби, ёлумны шашырдым.
Озь къулунъны къыдырып тап,
чюнки эмирлеринъни унутмадым!