‏ Psalms 140

Къанунны бозгъан адамлардан сакълагъан дува

Давутнынъ зебуры.

1Я РАББИ, Сени чагъырам, ашыкъ манъа!
Сени чагъыргъанда, къулакъ ас ялварувларыма!
2 aДувам Сенинъ алдынъа
якъылгъан отларнынъ хош къокъусы киби етип барсын,
къол котергенлерим акъшам бахшышы киби олсун!
3 bЯ РАББИ, агъзыма бекчи къой,
дудакъларымнынъ къапусыны къору!
4Юрегиме яман ишлерге ынтылмагъа ёл берме,
яманлыкъ япкъан адамларгъа къошулып,
къанунсызлыкъ эйлемесини багъышламайым,
оларнынъ татлы ашларыны ашамайым!
5 cИнсафлы адам мени урса – севги косьтерир,
мени къабаатласа – башыма ягъ силер,
бундан мен баш тартмам.
Дуваларым але даа къанунсызлыкъ япкъанларгъа къаршы.
6 dБашлыкълары Къаягъа урулып дагъылдылар.
Меним сёзлериме къулакъ асарлар,
оларнынъ татлы олгъаныны анъларлар.
7 eСанки ерде ачылгъан тюпсюз аралыкъкъа
кемиклеримиз олюлер дюньясы агъзына тёкюлелер.
8 fЛякин козьлерим Санъа тикильген,
РАББИ-ТААЛЯ, Санъа умют багъладым,
джанымны олюмге йиберме.
9 gМанъа къоюлгъан тузакълардан,
беля кетириджилернинъ къапкъанларындан сакъла мени.
10 hЯрамайлар озь авларына тюшер,
мен исе къуртулып кетерим.
Copyright information for CrhCTB