‏ Psalms 144

Макътав гимни

Давутнынъ макътав йыры.

Алеф 1Эй, Аллам, эй, Падишам! Сени юксельтирим,
Адынъны эбедий алгъышларым!
Беит 2Сени эр кунь алгъышларым,
Адынъны эбедий макътарым!
Гимел 3 ^aРАББИ улудыр,
О, чокъ макътавгъа ляйыкътыр,
Онынъ улулыгъына акъыл етмез!
Далет 4Бир несиль башкъа несильге Сенинъ ишлеринъни макътар,
Сенинъ къудретинъ акъкъында айтарлар.
Хе 5Сенинъ буюклигинъ, шан-шуретинъ,
аджайип ишлеринъ акъкъында тюшюнирим!
Вав 6 ^bКъоркъунчлы ишлеринънинъ къудрети акъкъында айтарлар.
Сенинъ улулыгъынъны айтып берерим!
Зайин 7Буюк эйилигинъни хатырлап бильдирирлер,
Сенинъ адалетинъе йырлар айтарлар!
Хет 8 ^cРАББИ мераметли ве шефкъатлы!
О, пек сабырлы! Севгиси буюк!
Тет 9РАББИ эр бир инсангъа хайырлыдыр!
Онынъ шефкъаты бутюн ишлериндедир!
Ёд 10Я РАББИ! Бутюн яраткъанларынъ Санъа шукюр этер!
Азизлеринъ Сени алгъышлар!
Каф 11– 12Инсан огъулларына Сенинъ къудретинъни
ве шан-шуретли Падишалыгъынъны бильдирмек ичюн,
Ламет Падишалыгъынънынъ шурети акъкъында айтарлар,
кучь-къудретинъ акъкъында икяе этерлер!
Мим 13 ^dСенинъ Падишалыгъынъ – эбедий Падишалыкътыр,
несильден несильге Сен – Укюмдарсынъ.
Самек 14 ^eЭр бир йыкъылгъангъа РАББИ – аркъа,
эр бир бели букюльгенни О, котерип тура.
Айин 15 ^fЭписининъ козьлери Санъа беклеп бакъа,
озь вакътында оларнынъ ашыны Сен бересинъ.
Пе 16 ^gСен къолунъны ачасынъ да,
бутюн джанлыларны истегени къадар тойдурасынъ.
Саде 17РАББИ бутюн арекетлеринде адалетлидир!
Бутюн ишлеринде О, эйидир!
Коф 18 ^hРАББИни чагъыргъангъа,
Оны ишанчнен чагъыргъан эр бир инсангъа якъындыр О.
Реш 19 ⁱОндан къоркъкъанларнынъ истегини О, беджерир,
агълап имдат истегенлерни эшитир ве оларны къуртарыр!
Шин 20РАББИни севген эр кесни О, къорчалай,
ярамайларнынъ эписини исе ёкъ этер.
Тав 21Тилим РАББИге макътавлар айтар,
бутюн яшагъанлар Онынъ мукъаддес Адыны эбедиен алгъышлар!