a Эюп 23.10; Збр 65.10
b Эюп 23.11
c Збр 30.22
d Текр 32.10; Рут 2.12; Збр 35.8; 56.2; 62.8; 90.4; Зек 2.8
e Збр 118.70
f Эюп 38.40; Збр 9.29
g Эюп 19.26; 33.26

‏ Psalms 16

Раббиге умют

Давутнынъ дувасы.

1Я РАББИ, меним акъикъатымны динъле,
фигъаныма къулакъ ас,
ялансыз дудакъларымдан чыкъкъан дувамны къабул эт!
 2Озюнъ мени суд эт,
Сенинъ козьлеринъ акъикъаткъа бакъсын!
 3 aСен юрегимни сынадынъ, гедже манъа кельдинъ.
Сен мени сынадынъ ве ич бир яманлыкъ тапмадынъ.
Дудакъларым гуна япмайджакъ, къарарына кельдим.
 4Сенинъ сёзлеринъе коре,
мен адамларнынъ ишлеринде
зулумлыкъ ёлларындан озюмни сакъладым.
 5 bАдымларымны Сенинъ ёлларынъда туттым,
меним аякъларым таймады.
 6Санъа ялварам мен, эй, Алла,
Сен мени эшитеджексинъ.
Къулагъынъны ас манъа, сёзюмни динъле!
 7 cАджайип севгинъни косьтер!
Сен онъ къолунънен Санъа ишангъанларны
Санъа къаршы чыкъкъанлардан къуртарасынъ!
 8 dКозь бебеги киби, мени къорчала,
Озь къанатларынънынъ кольгесинде мени сакъла
 9манъа уджюм эткен яман адамлардан,
эр ерден джанымны сарып алгъан душманларымдан!
 10 eОларнынъ юрегини ягъ баскъан,
агъызлары къопайып макътаналар.
 11Эр адымда мени сарып алып,
мени ерге урмакъ ичюн,
козьлерини манъа тиктилер.
 12 fОлар парча-парча этмеге истеген арслангъа,
гизли ерде яткъан арслан баласына ошайлар.
 13Я РАББИ, тур!
Оларгъа уджюм этип, оларны ерге йыкътыр!
Озь къылычынънен джанымны ярамайлардан къуртар!
 14Я РАББИ, бойле адамлардан,
шу дюньянынъ адамларындан
Озь къолунънен мени къуртар!
Олар озь пайыны бу дюньяда алдылар.
Сен оларнынъ къурсакъларыны анбарларынъдан толдурасынъ:
огъуллары токъ, къалымты исе балаларына етеджек!
 15 gМен исе акъикъатта Сенинъ бетинъе бакъаджагъым,
уянгъанымда, Сенинъ сыфатынъа тояджагъым.
Copyright information for CrhCTB