Psa 17 | CrhCTB | STEP | Баш чалгъыджы ичюн. РАББИнинъ къулу акъкъында. РАББИ Давутны эписи душманларындан ве Шаулнынъ къолундан къуртаргъан куню, Давут РАББИге бу йырны йырлады:

1 Баш чалгъыджы ичюн. РАББИнинъ къулу акъкъында. РАББИ Давутны эписи душманларындан ве Шаулнынъ къолундан къуртаргъан куню, Давут РАББИге бу йырны йырлады:
2 ^aСени севем, я РАББИ!
Сен меним къуветимсинъ!
3 ^bРАББИ – меним къаям,
меним къалем ве меним къуртарыджымдыр!
Аллам – меним къаям, мен Онъа умют багълайым.
О – меним къалкъаным, къуртулышымнынъ къувети,
меним юксек, енъильмез керменим!
4 ^cМакътавгъа ляйыкъ РАББИмни чагъыраджагъым,
ве О, мени душманларымдан къуртараджакъ.
5 ^dОлюм йиплери мени сарып алды,
акъсызлыкънынъ дерьялары мени зияде къоркъузды.
6 ^eДжеэннем зынджыры мени багълады,
олюм тузакълары мени якъалады.
7 ^fБашым беляда къалгъанда,
РАББИмни чагъырдым,
Алламдан имдат истедим.
Сарайындан О, сесимни эшитти,
яйгъаргъаным Онынъ къулагъына барып етти.
8 ^gО, гъазаплангъаны ичюн, ер юзю тепренип титреди,
дагъларнынъ темеллери сарсылып, еринден къыбырдады.
9 ^hБурнундан тютюн чыкъты,
агъзындан эр шейни ёкъ этиджи атеш фышкъырды,
алевленген комюр сепильди.
10 ⁱО, коклерни ачып, ашагъы тюшти,
аякъларынынъ тюбюнде къаранлыкъ эди.
11 ^jКерувнынъ устюне минип, учты,
ельнинъ къанатларында авеледи.
12 ^kОзюни къаранлыкънен орьтти,
къара, сувдан агъырлашкъан булутларгъа сарылды.
13 ^lОнынъ къаранлыгъы огюнде йылтырагъан нур джайыла,
ондан бурчакъ ве комюр алеви чыкъа.
14 ^mРАББИ коклерден гудюрдеди,
Юдже Алланынъ сеси котерильди,
бурчакъ ве атешли комюр ёллады.
15 ⁿО, окълар атып, душманларыны дагъытты,
йылдырымнен оларны шашмалатты.
16 ^oРАББИнинъ къоркъунчлы сесинден,
Онынъ ачувлы нефесинден денъизнинъ сув башы ачылды,
ер юзюнинъ темеллери корюнди.
17 ^pЮкъарыдан элини узатып, О, мени алды,
терен сувлардан чыкъарды,
18 ^qкучьлю душмандан сакълады,
мени кореджек козю олмагъанлардан,
менден кучьлю душманларымдан къорчалады.
19 Башыма беля тюшкенде,
олар манъа уджюм эттилер,
лякин РАББИ манъа ярдым этти.
20 ^rО, мени чаресиз алдан чыкъарды,
менден разы олгъаны ичюн, мени къуртарды.
21 ^sРАББИ инсафлыгъыма коре манъа мукяфат берди,
эллеримнинъ темизлигине коре манъа къайтарды.
22 Мен РАББИнинъ эмирлерини тута эдим,
Алламнынъ огюнде яманлыкъ япмадым.
23 Къарарларынынъ эписи – козюм огюнде,
низамнамелеринден чекильмедим мен.
24 ^tОнынъ огюнде къабаатсыз эдим,
гуна япмакътан сакъындым.
25 РАББИ инсафлыгъыма коре манъа мукяфат берди,
Онынъ огюнде эллеримнинъ темизлигине коре манъа къайтарды.
26 Ишанчлы адамнен Сен ишанчлысынъ,
къабаатсыз адамнен – бутюнлей догърусынъ.
27 Темиз адамнен – темизсинъ,
яланджыгъа яланына коре бересинъ.
28 ^uАлчакъгонъюллини къуртарасынъ,
макътангъан адамны исе алчакълатасынъ.
29 ^vСен лампадыма нур бересинъ!
РАББИ олгъан Аллам къаранлыгъымны айдынлата.
30 Сенинъ къуветинънен мен ордуларны къырам,
Алламнен берабер диварларгъа чыкъам.
31 ^wАлланынъ ёлу къусурсыздыр!
РАББИнинъ сёзю къавийдир!
Онъа умют багълагъанларнынъ эписини О, къорчалай!
32 ^xРАББИден гъайры башкъа Алла бармы?
Алламыздан гъайры башкъа сарсылмаз къая бармы?
33 Алла манъа кучь бере,
догъру ёлны косьтере.
34 ^yАякъларымны джейран киби тез япа,
юксеклерге мени къоя.
35 ^zКъолларымны дженк этмеге азырлай,
эллеримни тунч яйны тартмагъа огрете.
36 Манъа берильген къуртарувынъ – къалкъан кибидир,
онъ къолунъ манъа ярдым эте,
мераметинъ мени къуветлештире.
37 Аякъ тюбюмдеки ёлны кениш япасынъ,
аякъларыма таймагъа ёл бермейсинъ.
38 ^aaДушманларымнынъ пешинден къувалайым,
артларындан етем.
Олар тамамынен гъайып олмагъандже,
артыма къайтмайым.
39 Мен оларны агъыр яралайым.
Олар бир даа котерильмейлер,
аягъым астына йыкъылалар.
40 Сен манъа дженк этмек ичюн кучь бересинъ,
манъа къаршы исьян котергенлерни огюмде ерге йыкъасынъ.
41 ^abДушманларымны менден къачмагъа меджбур этесинъ,
менден нефретленгенлерни ёкъ этем.
42 ^acОлар ярдым истейлер,
амма оларны къуртаргъан кимсе ёкъ.
РАББИни чагъыралар,
амма О, оларны эшитмей.
43 ^adМен оларны топракъкъа айландырам,
ель огюнде тоз киби япам,
сокъакъ чамуры киби таптап эзем.
44 ^aeСен мени халкъымнынъ исьянындан къорчаладынъ.
Мени тюрлю миллетлерге башлыкъ этмек ичюн къойдынъ.
Мен бильмеген халкъ манъа хызмет эте.
45 ^afОлар эмирлеримни эшитип, шу ань беджерелер;
ябанджылар манъа ялтакъланып бойсуналар.
46 ^agЯбанджыларнынъ отьлери патлай,
къалтырап, сакълангъан ерлеринден чыкъалар.
47 РАББИ яшай! Онъа, меним Къаяма, шукюрлер олсун!
Меним Алламны, Къуртарыджымны,
Къаямны шуретленъиз!
48 ^ahАлла, Сен меним ичюн интикъам аласынъ,
халкъларны манъа бойсундырасынъ,
49 мени душманларымдан къуртарасынъ.
Манъа къаршы чыкъкъанлардан
Сен мени юксельттинъ,
мераметсиз адамдан мени къуртардынъ!
50 ^aiШунынъ ичюн, РАББИ, чешит тюрлю миллетлернинъ огюнде
Санъа шукюрлер этеджегим,
Адынъа шан йырларыны йырлайджагъым!
51 ^ajСен Озь падишанъны къуртарасынъ,
Озь Месихинъе Давуткъа ве эвлятларына эбедиен Сенинъ севгинъни косьтересинъ!