‏ Psalms 24

Къорчалав ве ёл косьтерюв дувасы

Давутнынъ зебуры.

Алеф 1 ^aЯ РАББИ, джаным Сени чагъыра!
Беит 2Санъа ишанам, меним Аллам!
Мен эбедиен утанмайым,
душманларым меним устюмден тантана этмесинлер!
Гимел 3 ^bСанъа ишангъан ич кимсе утанмасын,
себепсиз хаинлик япкъанлар исе утансынлар.
Далет 4 ^cЯ РАББИ, манъа Озь ёлларынъны косьтер,
Сенинъ излеринъден юрмеге огрет.
Хе 5 ^dМени акъикъатынъ ёлуна догърулт ве огрет мени,
чюнки Сен – Къуртарыджы Алламсынъ,
Вав мен Санъа эр кунь ишанам.
Зайин 6 ^eЯ РАББИ, Озь шефкъатынъны,
эм де севгинъни эсинъе кетир,
чюнки олар асыр-асырдан.
Хет 7 ^fЯшлыгъымда япкъан гуналарымны
ве къанун бозгъанымны эсинъде тутма.
Лякин Сенинъ буюк севгинъ
ве Сенинъ эйилигинъ ичюн,
мени эсинъе кетир, я РАББИ!
Тет 8РАББИ хайырлы ве догърудыр,
О, гунакярларгъа ёл косьтере.
Ёд 9О, юваш адамларны акъикъат ёлуна къоя,
оларгъа Озь ёлларыны огрете.
Каф 10Онынъ васиетини ве шаатлыкъларыны туткъанлар ичюн
РАББИнинъ бутюн ёллары – севги ве акъикъаттыр.
Ламет 11 ^gЯ РАББИ, Озь Адынънынъ хатири ичюн,
къабаатым чокъ олса да, оны багъышла.
Мим 12РАББИден къоркъкъан адам ким?
РАББИ онъа сайлайджакъ ёлуны косьтерир.
Нун 13 ^hОнынъ джаны яхшылыкъта оладжакъ,
эвлятлары исе топракъкъа саип оладжакъ.
Самек 14РАББИ Озь сырыны Ондан къоркъкъанларгъа ачар,
Озь васиетини де оларгъа бильдирир.
Айин 15 ⁱКозьлерим эр вакъыт РАББИге бакъалар,
О, аякъларымны тузакътан чыкъара.
Пе 16Манъа бакъып, манъа мерамет эйле,
чюнки мен ялынъыз къалдым ве азап чекем.
Саде 17Юрегимде дертлер толып-таша,
беляларымдан мени къуртар!
18Азапларыма ве беляларгъа огърагъаныма бакъ,
бутюн гуналарымны багъышла!
Реш 19Душманларыма бакъ, олар не къадар чокълашкъан!
Оларнынъ мени кореджек козю ёкъ!
Шин 20Джанымны сакъла ве къорчала мени!
Санъа умют багъладым, деп утанмайым.
Тав 21Къабаатсызлыкъ ве догърулыкъ мени сакъласынлар,
чюнки мен Санъа ишандым.
22 ^jЭй, Алла,
Исраильни бутюн белялардан къуртар!