Psalms 26
Давутнынъ умюти
Давутнынъ зебуры.
1 aРАББИ – меним ярыгъым ве къуртулышымдыр,мен кимден къоркъарым?
РАББИ – омрюмнинъ къалесидир,
мен кимнинъ огюнде титрерим?
2Яманлыкъ япкъанлар манъа якъынлашсалар,
душманларым ве манъа къаршы олгъанлар беденимни ашамагъа истеселер,
олар озьлери сюрюнип йыкъыладжакълар.
3 bКъаршыма бир орду чыкъса да,
юрегиме къоркъу тюшмез.
Манъа къаршы дженк башланса да,
кене умюттен кесильмем.
4 cБир шейни истедим РАББИден,
мен тек бир шейни къыдырам:
РАББИнинъ Эвинде омюр боюнджа къалмакъ,
РАББИнинъ дюльберлигини корьмек,
Онынъ Сарайыны сейир этмек.
5Агъыр куньде О, мени Озь сыгъынагъында сакълар,
Озь чадырында мени къорчалар,
юксек къая устюне мени алып чыкъар.
6 dО вакъытта мени сарып алгъан душманларыма къаршы
мен башымны котерип юреджегим;
РАББИнинъ чадырында къурбанлар чалып,
къуванчнен къычыраджагъым,
РАББИге йырлайджагъым ве чалгъы чаладжагъым!
7Я РАББИ, меним чагъыргъан сесимни эшит,
манъа мерамет эт ве манъа джевап бер.
8 eСен юрегиме: «Меним юзюмни къыдыр», – дединъ.
Сенинъ юзюнъни къыдыраджагъым, я РАББИ!
9Юзюнъни менден сакълама,
гъазап ичинде къулунъны ред этме.
Сен меним ярдымджым олдынъ,
менден вазгечме, ташлап кетме мени,
эй, Аллам, меним Къуртарыджым!
10 fАнам-бабам мени ташлап кетселер де,
РАББИ мени къабул этер.
11 gЯ РАББИ, Озь ёлунъны манъа огрет,
душманларым ичюн, манъа догъру ёлны косьтер.
12 hЯланджы шаатлар манъа къаршы баш котерди,
агъызларындан зулум чыкъа,
лякин душманларымнынъ къолуна мени берме.
13 iМеним ишанчым къатты:
мен мытлакъа тирилер дюньясында
РАББИнинъ яхшылыгъыны кореджегим.
14 jРАББИге ишан!
Джесюр ол, юрегинъе кучь бер
ве РАББИге ишан!
Copyright information for
CrhCTB