Psalms 27
Ярдым дувасы
Давутнынъ зебуры.
1 aЯ РАББИ, Сени чагъырам! Меним Къаям! Мени джевапсыз къалдырма!Ёкъса, Сен манъа джевап бермесенъ,
мен мезаргъа тюшкенге ошайджагъым.
2 bМен Сенден ярдым истегенимде,
Энъ Мукъаддес Еринъе тараф къолларымны котергенимде,
ялваргъан сесиме къулакъ ас!
3 cЯрамай ве беля кетириджи адамлар
озь къомшуларынен муаббет лаф этелер,
лякин юреклеринде къара ниет сакълайлар.
Оларны ёкъ эткенде,
оларнен берабер мени де къырып ташлама!
4Оларнынъ ишлерине коре,
яманлыкъларына коре,
къоллары япкъанларына коре,
къазангъанларына коре акъларыны бер!
5 dОлар РАББИнинъ эткенлерине,
Онынъ къолларынынъ ишлерине
эмиет бермегенлери ичюн,
О, оларны ерге йыкъар,
кене аякъ устюне турсатмаз.
6РАББИни алгъышлайым,
чюнки О, меним ялваргъанымны эшитти.
7 eРАББИ манъа къудрет бере ве мени къорчалай!
Мен Онъа ишандым, ве О, манъа ярдым этти!
Юрегим къуванчкъа толды,
мен йыр йырлап, Онъа шукюр этерим!
8РАББИ – Озь халкъынынъ къудретидир;
Озь сайлагъан падишаны О, къорчалар ве къуртарыр!
9 fОзь халкъынъны къуртар,
Озь мирасынъа яхшылыкъ яп;
оларнынъ чобаны ол,
оларны эр вакъыт юксельт!
Copyright information for
CrhCTB