d Збр 9.26
Psalms 29
Къуртулыш йыры
1Давутнынъ зебуры. Сарайны багъышламакъ вакътында йырлангъан йыр.2 aСени юксельтирим, я РАББИ,
чюнки Сен мени аякъкъа турсаттынъ,
душманларыма меним устюмден тантана этмеге ёл бермединъ.
3Я РАББИ, Аллам, мен Сенден ярдым истедим,
ве Сен мени тедавийлединъ.
4 bДжанымны олюлер дюньясындан къайтардынъ,
я РАББИ,
мезаргъа кирмейджегим ичюн,
манъа омюр багъышладынъ.
5РАББИге чалгъы чалынъыз,
эй, Онынъ азизлери!
Онынъ мукъаддес шерефине шукюр этинъиз!
6 cОнынъ гъазабы – бир ань,
разылыгъы исе – омюр боюнджа девам этер.
Акъшам агълав эшитильсе,
саба къуванч кетирир.
7 dМен къайгъысыз яшагъанда:
«Ич бир вакъыт мен сарсылмам», – дедим.
8Я РАББИ, менден разы олгъан вакътында
Сен меним дагъымны къавийлештирдинъ,
амма сонъ менден юзюнъни сакъладынъ,
ве мен шашмаладым.
9Я РАББИ, Сени чагъырдым,
мен Раббиден мерамет истедим:
10 e«Мен мезаргъа кирсем,
аятымдан не файда?
Топракъ Санъа шукюр этерми,
акъикъатынъны айтып берерми?
11Эшит мени, я РАББИ, ве мерамет эт манъа!
Я РАББИ, манъа ярдымджы ол!»
12 fСен агълавымны оюн-кулькюге айландырдынъ,
матем урбамны чыкъарып, белиме къуванч такътынъ!
13Джаным токътамайып, Сени шуретлесин!
Аллам, я РАББИ, мен Санъа эбедий шукюрлер этеджегим!
Copyright information for
CrhCTB