‏ Psalms 30

Аллагъа умют дувасы

1Баш чалгъыджы ичюн. Давутнынъ зебуры.
2 ^aЯ РАББИ, Санъа умют багъладым,
мен ич бир вакъыт утанмайым!
Озь догърулыгъынъда къуртар мени!
3 ^bМанъа къулакъ ас, тез-тез къуртар мени!
Меним таянаджакъ къаям,
мени къуртараджакъ сыгъынакъ эви ол!
4Меним къаям ве сакълангъан ерим – Сенсинъ;
Озь Адынъ ичюн мени етеклеп,
манъа ёл косьтер!
5Мен ичюн япылгъан гизли тузакътан чыкъар мени,
чюнки сакълангъан ерим – Сенсинъ.
6 ^cРухумны Сенинъ къолунъа берем.
Сен мени сатын алдынъ,
я РАББИ, эй, акъикъий Алла!
7 ^dБош путларгъа ибадет эткенлерни кореджек козюм ёкъ,
мен тек РАББИге ишанам.
8Сенинъ буюк севгинъ ичюн мен къуванчнен къычырып севинеджегим,
чюнки Сен ярамай алымны корьдинъ,
джаным азап чеккенини бильдинъ.
9 ^eСен мени душманымнынъ къолуна бермединъ,
аякъларымны къатты ерге къойдынъ.
10 ^fЯ РАББИ, манъа мерамет эт.
Мен сыкъылып къалдым,
къайгъыдан козьлерим коралмай,
джаным ве беденим де такъаттан кесильди.
11Мына, аятым къасеветтен азды,
омюр йылларым агълай-агълай кечип кетти.
Гуналарымдан такъаттан кесильдим,
кемиклерим де къуруды.
12 ^gДушманларым чокъ олгъаны ичюн,
адамлар мени масхара этелер,
къомшуларым манъа къыйыш бакъа,
танышларыма да къоркъу сачам.
Мени сокъакъларда корьгенлер менден къача.
13 ^hАдамларнынъ юреклери мени, олюни киби, унуттылар;
мен парчалангъан савуткъа ошап къалдым.
14 ⁱЧокъ адамнынъ яман сёзлерини эшитем;
мына, къоркъу эр ерни басты,
олар манъа къаршы анълашалар,
джанымны алмагъа ниетленелер.
15Мен исе Санъа ишанам, я РАББИ!
«Сенсинъ меним Аллам», – дейим.
16 ^jЭр бир кунюм Сенинъ къолунъда;
душманларымнынъ ве мени къувалагъаннынъ къолларындан
къуртар мени, я РАББИ!
17 ^kЮзюнънинъ нуру къулунъны ярыкълатсын;
Сенинъ буюк севгинъде мени къуртар!
18Я РАББИ, Сени чагъыргъаныма утанмайым.
Ярамайлар исе масхара олсун,
олюлер дюньясында оларнынъ сеслери кесильсин.
19Яланджыларнынъ тили тутулсын;
олар утанмайып, инсафлыны акъаретлей,
макътанып, юкъарыдан бакъалар.
20Сенден къоркъкъан адамлар ичюн
Сен не къадар чокъ яхшылыкълар азырладынъ!
Инсан огъулларынынъ козю огюнде
Сен оларны Санъа ишангъанлар ичюн сакъладынъ!
21Сен Санъа ишангъанларны янынъда сакълап,
инсанларнынъ фитнесинден оларны къорчалайсынъ.
Адамларнынъ яман тиллеринден
гизли ерде оларны сакълайсынъ.
22 ^lРАББИге шукюрлер олсун!
Пекитильген шеэрде О, манъа аджайип севгисини косьтерди!
23Къасевет ичинде: «Козюнъден джоюлдым», – дедим.
Амма Сенден ярдым истедим,
ве Сен ялваргъан сесимни эшиттинъ.
24 ^mРАББИни севинъиз, Онынъ бутюн азизлери!
РАББИ ишанчлы адамларны къорчалай,
озьлерини юксек туткъанларгъа исе арткъачнен акъларыны бере.
25 ⁿЭй, РАББИге ишангъанларнынъ эписи!
Къуветли олунъыз, юреклеринъиз къавий олсунлар!