‏ Psalms 33

Алланынъ яхшылыгъына макътав

1 ^aДавутнынъ зебуры. Давут Авимелекнинъ огюнде озюни делиликке урып, онынъ янындан къувулып кетти.
Алеф 2Эр вакъыт РАББИни алгъышлайым,
Онъа макътавларым тилимден тюшмез!
Беит 3 ^bДжаным РАББИнен макътаныр,
алчакъгонъюллилер буны эшитип къуваныр!
Гимел 4Меннен берабер РАББИнинъ улулыгъыны бильдиринъиз;
айдынъыз, берабер Онынъ Адыны шерефлейик!
Далет 5 ^cРАББИни чагъыргъанымда,
О, манъа джевап берди,
бутюн къоркъуларымдан мени къуртарды.
Хе 6Онъа бакъкъанларны ярыкъ къаплады,
оларнынъ бетлери энди къызармаз.
Зайин 7 ^dБу фукъаре чагъыргъанда, РАББИ эшитти,
бутюн белялардан оны къуртарды.
Хет 8 ^eРАББИнинъ Мелеги РАББИден къоркъкъанларны къорчалай
ве оларны къуртара.
Тет 9 ^fДамыны бакъынъыз, РАББИ не къадар эйидир!
Не къадар бахтлыдыр Онъа умют багълагъан адам!
Ёд 10 ^gРАББИден къоркъунъыз, эй, Онынъ азизлери!
Ондан къоркъкъан адам ич мухтадж олмаз.
Каф 11 ^hЯш арсланлар къыйнала ве ач олалар;
РАББИни къыдыргъанлар исе ич бир яхшы шейден эксик олмаз.
Ламет 12Эй, огъулларым, келинъиз, мени динъленъиз!
РАББИден къоркъмакъны сизге огретейим.
Мим 13 ⁱГузель аят ве узун омюр севген,
яхшы куньлер корейим, деген адам ким?
Нун 14 ^jСенинъ тилинъ яман сёзлерни айтмасын,
сенинъ агъзынъ алдатмасын.
Самек 15 ^kЯманлыкътан къачып, яхшылыкъ яп,
муаббетни къыдырып, оны илерилет.
Айин 16 ^lРАББИнинъ козьлери инсафлыларгъа бакъа,
къулакълары ярдым фигъанларына ачыкъ.
Пе 17 ^mРАББИ яманлыкъ япкъанлардан юзь чевиреджек,
оларнынъ хатырасыны ер юзюнден ёкъ этеджек.
Саде 18Инсафлылар чагъырса, РАББИ эшитир,
бутюн белялардан оларны къорчалар.
Коф 19 ⁿРАББИ къырыкъ юрекли адамларгъа якъын,
О, рухтан тюшкенлерни къуртараджакъ.
Реш 20 ^oИнсафлынынъ белялары чокъ олур,
амма РАББИ оны эписинден къуртарыр.
Шин 21 ^pКемиклерининъ ич бириси сынмасын деп,
О, оларнынъ эписини сакълар.
Тав 22Яманлыкъ ярамай адамны ольдюрир,
инсафлыдан нефретленгенлер де джезаланыр.
23РАББИ Озь къулларынынъ джаныны сатын алыр,
Онъа умют багълагъанлардан ич бириси джезаланмаз!