Psalms 35
Алланынъ севгиси ве Къанун бозуджылыкъ
1Баш чалгъыджы ичюн. РАББИнинъ къулу акъкъында. Давутнынъ зебуры.2 aИчимде юрегим ярамай адамнынъ
къанунсыз япкъанлары акъкъында айтып бере:
«Онынъ козю огюнде Алладан къоркъмакъ деген шей ёкъ».
3О, озь-озюне пек чокъ ялтакълана,
шунынъ ичюн озь гунасыны тапып оламаз
ве ондан нефретленмез.
4Онынъ агъзындан чыкъкъан сёзлер – айнеджилик ве ялан,
акъылланмагъа ве эйилик япмагъа даа истемез.
5 bО, яткъан тёшегинде беляны тюшюне,
яхшы олмагъан ёлгъа адым атып,
яманлыкътан юзь чевирмей.
6 cЯ РАББИ, Сенинъ севгинъ коклергедже,
ишанчлылыгъынъ булутларгъа къадар!
7 dДогърулыгъынъ – буюк дагълар киби,
къарарларынъ исе – тюпсюз теренлик.
Инсан ве айванларны Сен къорчалайсынъ, я РАББИ!
8 eЭй, Алла, не де паалыдыр Сенинъ буюк севгинъ!
Къанатларынънынъ кольгесинде
адам огъуллары хавфсызлыкъ тапалар.
9Олар Сенинъ эвинънинъ энъ яхшы берекетинден тоялар;
Сен оларгъа татлы сувларынъдан ичмеге бересинъ.
10 fОмюр чокърагъы Сендедир;
Сенинъ нурунъдан биз ярыкъ коремиз.
11 gСени бильгенлерге севгинъни косьтермеге девам эт,
акъикъатынъны догъру юреклилерге бермеге девам эт!
12Макътангъан адамнынъ аягъы мени басмасын,
гунакярнынъ къолу мени эвсиз къалдырмасын.
13 hКъанунны бозгъанлар ашагъы тюштилер,
олар йыкъылдылар ве турып оламайлар.
Copyright information for
CrhCTB