Psalms 47
Сион – Алланынъ шеэри
1Къорах огъулларынынъ зебуры. Йыр.2 aРАББИ улудыр!
Алламызнынъ шеэринде, Онынъ азиз дагъында
Онъа чокъ макътавлар олсун!
3 bСион дагъы – гузель тёпеликтир,
бутюн ер юзюнинъ къуванчыдыр!
Онынъ шималь тарафында
улу падишанынъ шеэри бар.
4Алла онынъ сарайларында
къорчалайыджы къале киби белли.
5 cШунынъ ичюн падишалар топланып,
онынъ янына эписи якъынлашты.
6Шеэрни корьгенде исе, шаштылар,
пек къоркътылар да, къачтылар.
7 dДогъаяткъан къадыннынъ агърысы киби,
о ерде оларны къоркъу ве азап къаплады.
8 eСен, куньдогъуш елини кетирип,
Таршиш гемилерини парчалап ташладынъ.
9Биз эшиткен шейлерни
Алламызнынъ шеэринде,
Ордуларнынъ РАББИсининъ шеэринде корьдик.
Алла шеэрни эбедиен къавийлештиреджек.
Сэла
10 fЭй, Алла, Сенинъ Сарайынънынъ ортасында
биз буюк севгинъ акъкъында
тюшюнджеге далдыкъ.
11 gЭй, Алла, Сенинъ Адынъ киби,
шуретинъ де бутюн ер юзюнде даркъалгъан;
Сенинъ онъ къолунъ адалетке толгъан!
12 hСенинъ адалетли къарарларынъ ичюн,
Сион дагъы севинсин,
Ехуда къызлары къуванчнен къычырсын!
13Сион этрафында кезип,
оны айланып чыкъынъыз,
къуллелерни сайынъыз.
14Онынъ пекитильген ерлерине юрегинъизни чевиринъиз,
къуветлештирильген сарайларына бакъынъыз,
келеджек несильге шуны айтып беринъиз.
15Мына бу Алла эбедиен бизим Алламыздыр,
ольгенимиздже О, бизим Ёлбашчымыздыр!
Copyright information for
CrhCTB