‏ Psalms 49

Алланы унуткъан адамларгъа насиат

Асафнынъ зебуры.

1 ^aАллаларнынъ Алласы, РАББИ буюрды,
кунешнинъ догъгъан еринден
баткъан еринедже
О, ер юзюни чагъырды.
2 ^bАлла гузельден-гузель Сиондан парылдады.
3 ^cАлламыз келе, индемей турмаз.
Онынъ огюнде – эр шейни якъаджакъ атеш,
этрафында исе – кучьлю боран.
4 ^dОзь халкъына суд этмек ичюн,
О, ер юзюни ве юкъарыдан коклерни чагъыра:
5«Мен азизлериме Озь васиетимни къурбан вастасынен бердим.
Энди оларны Манъа топланъыз», – дей.
6 ^eКоклер Онынъ акъикъатыны бильдиреджеклер,
Алланынъ Озю – Укюм Чыкъарыджыдыр.

Сэла
7 ^f«Эй, халкъым, динъле, Мен айтаджагъым!
Эй, Исраиль, санъа къаршы шаатлыкъ береджегим.
Мен – Аллам, Сенинъ Алланъ.
8 ^gБахшышларынъ ичюн сени тазирлемейджегим,
бутюнлей якъылгъан къурбанларынъ эр вакъыт къаршымда.
9Мен не эвинъдеки тананы,
не къошларынъдаки эчкилерни истейим.
10 ^hОрманларнынъ бутюн айванлары Менимки,
бинъ къыр устюнде яшагъан джанаварлар да Менимки.
11Бутюн дагъ къушларыны Мен билем,
кийик айванлар да Меним алдымда.
12 ⁱАч олсам да, санъа айтмаз эдим,
чюнки Менимкидир дюнья ве оны толдургъан барлыкъ.
13Мен бугъа этини ашайыммы,
текелернинъ къаныны ичемми?
14 ^jАллагъа къурбан ерине шукюр кетир,
Юдже Аллагъа берген адакъларынъны беджер.
15 ^kБеля куньлеринде Мени чагъыр,
Мен сени къуртарырым,
ве сен Мени шуретлерсинъ».
16Гунакяргъа исе Алла шойле дей:
«Не ичюн сен Меним низамнамелеримни айтып бересинъ?
Меним васиетимни агъзынъа не ичюн аласынъ?
17Озюнъ исе огютимден нефретленип,
Меним сёзлеримни артынъа ташлайсынъ.
18Хырсызны корьгенде, онен келишесинъ.
Аиле садыкълыгъыны бозгъанларнен де дост оласынъ.
19 ^lАгъзынъны яман сёзлер ичюн ачасынъ,
тилинънен де фитнелер къурасынъ.
20Отурып, къардашынъа къаршы,
озь ананънынъ огълуна ялан айтасынъ.
21 ^mСен бу ишлерни яптынъ,
Мен исе индемедим;
Мени де сен киби, деп тюшюндинъ.
Энди Мен сени тазирлерим,
гуналарынъны козюнъ огюне тизерим.
22 ⁿБуны анълап алынъыз,
эй, сизлер, Алланы унуткъанлар!
Ёкъса Мен сизлерни парчалап ташлайым,
къуртарыджынъыз да олмаз.
23Ким къурбан ерине шукюр кетирсе,
Мени урьмет эте.
Ким озь ёлуна дикъкъат этсе,
Мен онъа Алланынъ къуртарувыны косьтереджегим».