‏ Psalms 54

Азап чеккен адамнынъ дувасы

1Баш чалгъыджы ичюн. Телли чалгъы алетлеринде. Давутнынъ маскили.
2 ^aЭй, Алла, меним дувамны эшит,
ялваргъанымдан юзь чевирме!
3Манъа дикъкъат эт, джевап бер манъа!
Мен къасевет этип, озюмни джойдым.
4Душман сесини котере,
ярамай адам манъа зулум кетире.
Олар мени белягъа тюшюрелер,
ачувнен манъа душманлыкъ япалар.
5Ичимде юрегим сызлай,
башыма олюм дешетлери тюшти.
6Къоркъу ве титрев мени басты,
дешет юрегимни къаплады.
7Мен айттым: «Ким манъа, гогерджиннинъ къанатлары киби,
къанат берер эди?
Мен учып кетер ве раат олур эдим.
8 ^bУзакъларгъа учып кетип,
чёльде къалыр эдим.

Сэла
9Фуртунадан, борандан тез къачып,
сакъланмагъа бир ер тапар эдим».
10 ^cЯ РАББИ, Сен оларны шашмалат,
ниетлерини ерине кетирмеге ёл берме,
чюнки шеэрде тек зулум ве къавгъа корем.
11Олар гедже ве куньдюз шеэр диварлары устюнде юрелер,
шеэр беля ве адалетсизликнен толып-ташкъан.
12Шеэрнинъ ортасында беля,
алдав ве зорбалыкъ мейданларындан кетмей.
13Эгер душман мени яманласа,
мен шунъа чыдар эдим.
Эгер мени кореджек козю олмагъан адам меним устюмде турса,
мен ондан къачар эдим.
14Амма бу сенсинъ, манъа тенъ олгъан, сен озюнъсинъ,
меним якъын достум, меним джан достум!
15 ^dБиз татлы субетлер этип,
халкънен бирликте Алланынъ Эвине бара эдик.
16 ^eОларнынъ башына олюм кельсин,
оларнынъ эвлеринде ве ичлеринде – тек яманлыкъ олгъаны ичюн,
олар тири олгъанда, олюлернинъ дюньясына тюшсюнлер.
17Мен исе Алланы чагъыраджагъым,
ве РАББИ мени къуртараджакъ.
18Акъшам, саба ве уйледе
мен Онъа ялварып къычыраджагъым,
ве РАББИ меним сесимни эшитеджек.
19О, мени аман-эсен этип,
манъа къаршы чыкъкъанлар чокъ олса да,
меним джанымны олардан сатын алыр.
20 ^fО, эшитеджек ве оларны бойсундыраджакъ.
О, эбедиен Озь тахтында отура!

Сэла
Олар исе ич денъишмей,
Алладан да къоркъмайлар.
21 ^gДостум онен муаббет яшагъанларгъа къол узатып,
озь анълашмасыны бозды.
22 ^hОнынъ тили ягъдан йымшакъ олса да,
юрегинде исе – душманлыкъ.
Сёзлери зейтюн ягъындан назик олса да,
керчектен исе олар – къынындан чыкъкъан къылыч.
23 ⁱКъасеветлеринъни РАББИге ташла,
ве О, санъа ярдымджы олур.
О, ич бир вакъыт инсафлы адамгъа
сарсылмагъа ёл бермез.
24 ^jКъанназ ве хаин адамлар исе
омрюнинъ ярысыны биле яшамайджакъ.
Сен оларны олюм чукъурына атаджакъсынъ,
эй, Алла!
Мен исе Санъа ишанаджагъым!