Psalms 57
Имансызларнынъ джезасы акъкъында Аллагъа дува
1 aБаш чалгъыджы ичюн. Аль-ташхет. Давутнынъ миктамы.2Эй, башлыкълар, сиз догърусыны айтасынъызмы?
Эй, инсан огъуллары, сиз догъру суд этесинъизми?
3Аксине, юрегинъизде инсафсыз шейлерни тюшюнесинъиз,
къолларынъызнен яманлыкъларны ольчеп,
оларны ер юзюне ёллайсынъыз.
4 bЯрамайлар догъулгъандан берли ёлдан урулдылар,
анасынынъ къурсагъындан чыкъкъанынен,
олар яланджыдыр, янълыш ёлнен кетелер.
5 cОларнынъ зеэри – йыланнынъ зеэри киби.
Олар сагъыр йылангъа ошап, къулакъларыны тыкъаталар:
6шу йылан ырымджынынъ сесини эшитмей,
ырымджы энъ уста олса биле, эшитмей.
7 dЭй, Аллам, оларнынъ агъзындаки тишлерни сындырып ташла,
я РАББИ, арсланларнынъ тишлерини чыкъарып ташла!
8Акъкъан сув киби, олар ёкъ олып кетсинлер,
олар яйларыны тарткъанда, окълары сынып къалсынлар.
9 eЧыкъчыкъ балабан киби, олар ирип кетсинлер;
олю догъулгъан балалар киби, олар кунешни корьмесинлер.
10Къазанларынъыз когем атешини дуймаздан эвель,
ель эм тазени, эм куйгенни савураджакъ.
11 fИнсафлы адам, оларгъа джеза берильгенини корип, къуванаджакъ,
ярамайнынъ къаны ичинде аякъларыны юваджакъ.
12 gО вакъытта инсанлар айтаджакъ:
«Инсафлы адамгъа мытлакъа акъкъы бериледжек,
мытлакъа ер юзюнде суд эткен Алла бар!»
Copyright information for
CrhCTB