Psalms 59
Исраильнинъ къуртулышы ичюн окъулгъан дува
1 aБаш чалгъыджы ичюн. «Шушан эдут» авасында. Давутнынъ миктамы. Огретюв ичюн.2 bДавут Арам-Нахараим ве Арам-Цованен дженк эткенде, Ёав къайтып, 12 000 эдомлыны Туз вадийинде ургъаны акъкъында язылгъан йыр.
3 cЭй, Алла, Сен бизлерни ташлап кеттинъ,
сыраларымызны ярып къойдынъ,
бизлерге гъазапландынъ.
Бизге чевириль!
4Сен ерни тепреттинъ, оны ярдынъ.
Энди исе бозукъ ерлерини тедавийле,
чюнки ер тепрене бере.
5 dСен Озь халкъынъа агъыр азаплар бердинъ,
бизге серсемлетиджи шарапны ичирдинъ.
6Сенден къоркъкъанлар огърунда Сен байракъ котердинъ,
олар онынъ янына яйдан къуртулып къачсынлар!
Сэла
7Сенинъ севгенлеринъ къуртулсынлар!
Сенинъ онъ къолунънен оларны къуртар!
Джевап бер манъа!
8 eАлла Озь азиз еринде деди:
«Мен Шекемни тантана иле боледжегим,
Сукъкъот вадийини ольчейджегим.
9Гилад Меним, Менашше де Меним.
Эфраим – башымдаки къале,
Ехуда – падишалыкъ таягъым.
10Моав – ювунгъан чанагъым;
Эдом устюне чызмамнен басаджагъым.
Фелестин топрагъында Мен гъалебе къазанып къычыраджагъым!»
11Ким мени пекитильген шеэрге кирсетеджек?
Ким мени Эдомгъа озгъарып бараджакъ?
12Эй, Алла, Озюнъ бизни ташлап кетмединъми?
Ордуларымызнен чыкъмайсынъ да, эй, Алла!
13 fБелялардан бизге ярдым эт,
чюнки инсаннынъ ярдымы боштыр.
14Биз Алланен батырлыкъ япармыз,
О, душманларымызны тар-мар этер!
Copyright information for
CrhCTB