Psalms 6
Беля куньлеринде окъулгъан ярдым дувасы
1 aБаш чалгъыджы ичюн. Телли чалгъы алетлеринде. Аль-хашшеминит. Давутнынъ зебуры.2 bЯ РАББИ, ачувынъда тазирлеме мени,
гъазабынъда мени джезалама!
3Аджы мени, я РАББИ,
меним кучь-къуветим ёкъ.
Мени тедавийле, я РАББИ,
кемиклерим къоркъудан титрей.
4 cДжаным да къоркъудан пек титрей.
Сен исе, я РАББИ, не вакъыткъадже бу шей девам этеджек?
5Къайт манъа, я РАББИ, джанымны къуртар,
буюк севгинъ ичюн къуртар мени!
6 dОльгенлер Сени анъмазлар,
олюлер дюньясында ким Санъа шукюр этер?
7Инълей-инълей мен ёрулдым.
Эр гедже агълагъаным ичюн, тёшегим сым-сылакъ,
козьяшларым тёшегимни сылата.
8 eКозюмнинъ нуру къайгъыдан къуру,
козьлерим бутюн душманларымдан зайыфлашты.
9 fЭй, яманлыкъ япкъанларнынъ эписи,
узакълашынъыз менден,
чюнки РАББИ агълагъанымны эшитти.
10РАББИ ялваргъанымны эшитти.
РАББИ дувамны къабул этеджек.
11 gБутюн душманларым масхара олып,
эписини дешет къапласын!
Кери къайтсынлар, апансыздан утансынлар!
Copyright information for
CrhCTB