‏ Psalms 68

Къасеветте ярдым сорав агълавы

1 ^aБаш чалгъыджы ичюн. Шошаним авасында. Давутнынъ зебуры.
2 ^bКъуртар мени, эй, Алла,
сувлар джаныма къадар етти.
3 ^cТерен батакъкъа баттым,
аякъ басмагъа ерим ёкъ;
терен сувлар ичине кирдим,
оларнынъ акъынтысы мени алып кете.
4 ^dМен фигъан котерип, болдурдым,
тамагъым къуруп къалды.
Алланы беклей-беклей,
козьлерим зайыфлашты.
5 ^eСебепсиз мени кореджек козьлери олмагъанлар
башымдаки сачлардан да чокъ олды.
Манасыз манъа къаршы чыкъкъанлар,
меним душманларым кучьке кирди.
Мен ич бир шей алмагъан олсам да,
къайтарып бермеге меджбур этелер.
6Эй, Алла, акъылсызлыгъымны Озюнъ билесинъ,
къабаатларымны да Сенден гизлемейим.
7Ордуларнынъ РАББИ-ТААЛЯсы,
меним ичюн Санъа умют эткенлер утанмасын!
Эй, Исраильнинъ Алласы,
меним ичюн Сени къыдыргъанлар масхара олмасын!
8 ^fСенинъ ичюн мен акъаретке къатландым,
утангъанымдан юзюмни къапаттым.
9 ^gАгъа-къардашларыма ят адам олдым,
озь анамнынъ огъулларына ябанджы олып къалдым.
10 ^hСенинъ Эвинъе олгъан шевкъим ичимде яна.
Сени яманлагъанларнынъ сёзлери
меним башыма тюшти.
11Агълап, аштан вазгечип, джанымны къыйнадым,
бу да манъа къабаат олды.
12Чувалдан озюме урба япкъанымда,
олар ичюн мен къара шакъа олдым.
13Шеэрнинъ араба къапусы янында
отургъанларнынъ агъзына тюштим,
шарап ичкенлер де меним акъкъымда йырлай.
14Я РАББИ, дувам Санъа разылыкъ вакътында етсин.
Эй, Алла, Сенинъ буюк севгинъде
манъа джевап бер,
манъа акъикъий къуртарувынъны косьтер.
15 ⁱМени балчыкътан чыкъар, батып кетмейим!
Мени кореджек козю олмагъан адамлардан,
терен сувлардан къуртулайым!
16Акъкъан сувлар мени алып кетмесин,
теренлик мени ютмасын,
олюм чукъурынынъ агъзы устюмден япылмасын!
17 ^jМанъа джевап бер, я РАББИ!
Сенинъ севгинъ эйидир,
шефкъатынъ буюклигинде манъа айлан.
18Озь юзюнъни къулунъдан гизлеме!
Юрегим яна. Манъа тез джевап бер!
19Якъынджа келип, джанымны сатын ал,
къуртар мени душманларымдан!
20Озюнь билесинъ,
башыма не къадар акъарет тюшти,
не къадар утандым, масхара олдым.
Душманларымнынъ эписи Сенинъ огюнъде.
21Акъареттен юрегимни къан басты,
мен хасталандым,
аджыгъанларыны бекледим, олмады,
теселли къыдырдым, лякин тапмадым.
22 ^kАшамакъ ичюн манъа оть бердилер,
сувсагъанымда манъа сирке ичирдилер.
23 ^lСофралары оларгъа тузакъ олсун,
аманлыкъ зияфетлери къапкъан олсун!
24 ^mОларнынъ козь нурлары сёнип къалсын,
беллери эр даим зайыф олсун!
25Сен гъазабынъны оларнынъ башына сач,
ачувынънынъ атеши оларгъа япышсын!
26 ⁿОларнынъ яшагъан ерлери бош къалсын,
чадырларында тири джан къалмасын!
27Сенден джеза алгъан адамны олар къува,
Сен яралагъан адамнынъ азапларыны даа зияде япалар.
28 ^oОларнынъ гунасына гуна къош,
Сен оларны акълама!
29 ^pТирилер китабындан адлары силинсин,
инсафлыларнен берабер олмасынлар!
30 ^qМен исе фукъаре ве азап чекем,
эй, Алла, Сенинъ къуртарувынъ мени аякъкъа тургъузсын!
31Йырымда Алланынъ Адыны макътайджагъым,
шукюрлер айтып, Оны юксельтеджегим!
32 ^rМына бу шей РАББИге эр бир туякълы, бойнузлы бугъадан,
я да танадан чокъ кейф кетирир.
33Тынч адамлар буны корип къуванаджакълар.
Эй, Алланы къыдыргъанлар,
сизинъ юреклеринъизге кене джан кирсин!
34РАББИ фукъарелерни эшите,
эсирликке тюшкенлерден О, игренмей.
35 ^sКоклер, ер юзю ве денъизлер,
олардаки бутюн джанлылар
Алланы макътасынлар!
36 ^tАлла Сионгъа къуртулыш берер,
Ехуданынъ шеэрлерини янъыдан къураджакъ.
Халкъ анда ерлешип, топракънынъ саиби оладжакъ.
37 ^uАлланынъ къулларынынъ эвлятлары топракъта ерлешеджеклер,
Алланынъ Адыны севгенлер анда яшайджакълар!