‏ Psalms 71

Падиша акъкъында дува

Сулейманнынъ зебуры.

1 ^aЭй, Алла, падишагъа – Озь укюминъни,
падишанынъ огълуна – адалетинъни багъышла!
2 ^bО, Сенинъ халкъынъны догърулыкънен,
фукъарелеринъни адалетнен суд этсин.
3Дагълар адамларгъа аманлыкъны кетирсин,
тёпеликлер исе – адалетни.
4 ^cО, халкънынъ фукъарелерине суд этсин,
гъарипнинъ огъулларыны къорчаласын,
залымны исе эзип ташласын!
5 ^dКунеш ве ай олгъан вакъытта,
бутюн несиллер Сенден къоркъаджакъ.
6 ^eОтлары чалынгъан чайыргъа тюшкен ягъмур киби,
топракъны суваргъан тамчылар киби,
О, дюньягъа тюшсюн.
7 ^fОнынъ куньлеринде инсафлы онъаджакъ,
ай ёкъ олгъандже, аманлыкъ чокълашаджакъ.
8 ^gДенъизден денъизге къадар,
буюк дерьядан ернинъ четлеринедже О, укюм этеджек.
9 ^hСахранынъ халкъы Онынъ алдында тиз чёкеджек,
душманлары топракъ ялайджакъ.
10 ⁱТаршишнинъ ве адаларнынъ падишалары Онъа бахшышлар кетиреджек,
Шева ве Сева падишалары Онъа берги береджек.
11 ^jБутюн падишалар Онъа бель букеджек,
бутюн халкълар Онъа хызмет этеджек.
12 ^kО, ярдым истеген факъырны,
ярдымджысы олмагъан фукъарени къуртараджакъ.
13Гъарип ве факъырны аджыйджакъ,
заваллыларнынъ джанларыны къуртараджакъ.
14 ^lО, баскъынджыдан ве залымдан оларнынъ джанларыны азат этеджек,
Онынъ козю огюнде оларнынъ къаны пек паалы оладжакъ.
15 ^mО, чокъ яшайджакъ, Онъа Шева алтыныны береджеклер,
токътамайып Онынъ ичюн дува окъуйджакълар,
эр кунь Онъа шукюр этеджеклер.
16 ⁿДюньяда чокъ ашлыкъ олсун,
о, дагъларнынъ башында далгъалансын,
мейва тереклери Ливан орманы киби олсун.
Шеэр халкъы исе ердеки от киби чокълашсын.
17 ^oОнынъ Ады эбедиен яшасын,
кунеш тургъандже Ады турсун.
Къабилелер О аркъалы яхшылыкъ кореджеклер,
бутюн халкълар Онъа «бахтлы» дейджеклер.
18 ^pРАББИ-Таалягъа,
Исраильнинъ Алласына бинъ шукюр олсун!
Аджайип ишлерини ялынъыз Озю япа!
19 ^qОнынъ шуретли Адына эр вакъыт шукюрлер олсун,
бутюн ер юзю Онынъ шуретинен толсун!
Амин! Амин!

20Шунынънен, Йишай огълу Давутнынъ дувалары битти.