Psalms 80
Байрам йыры
1 aБаш чалгъыджы ичюн. Аль-хаггиттит. Асафнынъ зебуры.2Бизге кучь берген Аллагъа къуванчнен йырланъыз!
Якъупнынъ Алласына севинчнен къычырынъыз!
3Чалгъы ачынъыз, даре урунъыз,
татлы сесли сантыр ве арфаны чалынъыз!
4 bЯнъы ай пейда олгъан куню бору чалынъыз,
толу ай куню, байрамымыз кунюнде!
5Бу – Исраильге къанундыр,
Якъуп Алласынынъ ферманыдыр.
6 cАлла Мысыр топрагъына къаршы чыкъкъанда,
О, буны Юсуфкъа шаатлыкъ этип берди.
Анда мен анъламагъан бир тиль эшиттим.
7 d«Онынъ елькесиндеки юкни енгиллештирдим,
къоллары сепетлерден къуртулды.
8 eБелялы куньде Мени чагъырдынъ,
ве Мен сени къуртардым,
гурюльдеген кок ичинден санъа джевап бердим,
Мерива сувларында сени сынадым».
Сэла
9 f«Динъле, халкъым, Мен санъа шаатлыкъ этеджегим,
эй, Исраиль, эгер сен Мени динълеген олсанъ!
10 gАранъызда башкъа алла олмасын,
ят халкънынъ алласына бель букме.
11РАББИ олгъан Алланъ – Меним,
Мен сени Мысыр топрагъындан алып чыкътым.
Агъзынъны кенъдже ач, Мен оны толдураджагъым!
12Амма халкъым лафыма къулакъ асмады,
Исраиль Манъа бойсунмагъа истемеди.
13 hШунынъ ичюн Мен оларны инат юреклеринен къалдырдым,
бильгенлери киби яшасынлар, дедим.
14 iКъана, эгер халкъым Манъа къулакъ асса,
Исраиль Меним ёлларымдан юрсе,
15душманларыны бир аньде енъер эдим,
зулум эткенлернинъ устюне къолумнен басар эдим!
16РАББИден нефрет эткенлер Онъа боюн эгер эдилер,
оларнынъ вакътына сонъ олмаз эди!
17 jОларгъа энъ яхшы богъдайны ашаттырыр эдим,
къаядан бал акъыздырып, оларны тойдурыр эдим!»
Copyright information for
CrhCTB