a Збр 39.18
Psalms 85
Къаарь кунюнде ярдым дувасы
Давутнынъ дувасы.
1 aКъулагъынъны меним тарафыма тутып,манъа джевап бер, я РАББИ,
чюнки мен заваллы ве факъырым.
2Джанымны сакъла, чюнки мен Сенден къоркъам.
Санъа умют багълагъан къулунъны къуртар,
я РАББИ!
3Манъа мерамет эт, Рабби,
мен эр кунь Санъа ялварам.
4 bКъулунънынъ джаныны къувандыр,
чюнки Санъа, я Рабби, джаным ынтыла.
5 cСен, Рабби, хайырлы багъышлайыджысынъ,
Сени чагъыргъанларнынъ эписине буюк севгинъни ачасынъ!
6Меним дувамны эшит, я РАББИ,
ялваргъан сесиме къулакъ ас!
7 dМусибет кунюнде Сени чагъыраджагъым,
ве Сен манъа джевап береджексинъ.
8 eАллалар арасында Санъа ошагъаны ёкъ,
ишлеринъе тенъ кельгени де ёкъ, я Рабби!
9 fСен яраткъан бутюн халкълар келип,
Сенинъ алдынъда бель букеджеклер
ве Адынъны шуретлейджеклер, я Рабби!
10 gСен улусынъ, аджайип шейлер япасынъ.
Ялынъыз Сен – Алласынъ.
11 hОзь ёлунъны манъа огрет, я РАББИ,
Сенинъ акъикъатынъа коре юреджегим;
Адынъдан къоркъмакъ ичюн
юрегимни къавий эт!
12Рабби-Тааля, джан-юректен Санъа шукюр этеджегим,
эбедиен Адынъны шуретлейджегим!
13 iСен манъа буюк севгинъни косьтердинъ,
олюлер дюньясынынъ чукъурындан джанымны къуртардынъ!
14 jАллам, къопай адамлар манъа къаршы котерильди,
джанаварлар ордусы джанымны къыдыра;
олар Сени акъылына биле кетирмейлер!
15 kАмма Сен, Рабби, шефкъатлы ве мераметлисинъ,
пек сабырлы, чокъ севген ве ишанчлысынъ!
16 lМанъа бакъып, аджы мени,
Озь къулунъны къуветлендир,
къул-къадынынънынъ огълуны къуртар!
17 mРазылыгъынънынъ бельгисини манъа косьтер,
оны менден нефрет эткенлер корьсюн
ве масхара олсунлар!
Сен, РАББИ, манъа ярдым эттинъ
ве меним гонълюмни алдынъ!
Copyright information for
CrhCTB