‏ Psalms 88

Аллагъа садыкъ падиша

1 ^aЭзрахлы Этаннынъ маскили.
2 ^bЯ РАББИ, Сенинъ буюк севгинъ акъкъында эбедиен йырлайджагъым,
акъикъатынъны бутюн несиллерге бильдиреджегим!
3Севгинъ эбедиен къатты турар, дедим;
акъикъатынъны коклерде ерлештирдинъ!
4«Мен Озь сайлагъаныма васиет бердим,
къулум Давуткъа ант эттим:
5 ^cСенинъ союнъ эбедиен кесильмез,
эвлятларынъ несиллернинъ эписине падишалыкъ этер».

Сэла
6 ^dЯ РАББИ, коклер Сенинъ аджайип ишлеринъни шуретлер,
азизлер топлашувында акъикъатынъны макътарлар!
7 ^eКоклерде РАББИге тенъ бармы?
Алланынъ огъуллары арасында РАББИ киби сою бармы?
8Азизлернинъ буюк топлашувында Алла къоркъунчлы,
этрафындакилернинъ эписи ичюн О, къоркъунчлыдыр.
9 ^fЯ РАББИ, Ордуларнынъ Алласы!
Сен киби къудретли кимдир, я РАББИ?
Акъикъатынъ бутюн этрафынъны сарды!
10 ^gСен къутургъан денъизге падишалыкъ этесинъ,
далгъалары котерильгенде, оларны Сен тынчландырасынъ.
11 ^hСен Рахавны тар-мар этип, олюм алына кетирдинъ,
кучьлю къолунънен душманларынъны дагъыттынъ.
12 ⁱКоклер – Сенинъ, ер де Сенинъ,
дюнья ве онынъ барлыгъыны Сен яраттынъ.
13 ^jШималь ве дженюп тарафларыны Сен яраттынъ,
Тавор ве Хермон дагълары Адынъа къуванчнен къычыралар.
14Сенинъ къолларынъ къавий,
къолунъ кучьлю, онъ къолунъ юксектир!
15 ^kТахтынънынъ темели – адалет ве догърулыкъ,
севгинен садыкълыкъ – эр даим алдынъда.
16 ^lНе де бахтлыдыр бору сесини бильген халкъ,
олар Сенинъ юзюнъ ярыгъында юрерлер!
17Адынъа халкъ бутюн кунь севинир,
адалетинънен юкъарыгъа котерилир!
18Оларнынъ къувети – Сенсинъ,
Сенинъ разылыгъынънен бизим союмыз гъалебе къазаныр!
19 ^mКерчектен, бизим къалкъанымыз – РАББИнинъкидир,
падишамыз – Исраильнинъ Азизининъкидир.
20Бир вакъытта Сен Озь азизлеринъе руяда дединъ:
«Мен бир джесюрге ярдым ёлладым,
халкъ арасындан сайлангъанны юксельттим.
21 ⁿКъулум Давутны таптым,
мукъаддес ягънен оны якътым.
22Къолум эбедиен онен оладжакъ,
Озюм онъа кучь береджегим.
23Душман оны енъип оламаз,
къанун бозгъаннынъ огълу онъа зулум эталмаз.
24 ^oДушманларыны онынъ козю огюнде къыраджагъым,
ондан нефрет эткенлерни ураджагъым.
25Меним акъикъатым ве севгим онен,
Меним Адымнен о, енъеджек.
26 ^pОнынъ къолуны денъиз устюне,
онъ къолуны – озенлер устюне къояджагъым».
27 ^qО, мени чагъырып, дейджек:
«Сен меним Бабамсынъ,
Алламсынъ, меним къуртарыджы Къаямсынъ!»
28 ^rМен оны биринджи огълум япарым,
дюнья падишаларындан юкъары къоярым.
29 ^sОнъа севгимни эбедиен сакъларым,
онъа берген васиетим бозулмаз.
30 ^tОнынъ сою эбедиен кесильмез,
онынъ падишалыкъ этювини коклернинъ куньлери киби девам эттиририм.
31«Эгер онынъ огъуллары къанунларымны къалдырып,
къарарларыма коре юрмеселер,
32эгер Меним къаиделеримни бозып,
эмирлеримни тутмасалар,
33 ^uакъсызлыгъы ичюн оларны таягъымнен,
къабаатлары ичюн – котекнен джезаларым.
34 ^vЛякин Озь севгимни ондан алмам,
садыкълыгъымны да денъиштирмем,
35Озь васиетимни бозмам,
берген сёзюмден къайтмам.
36 ^wБир кере мукъаддеслигимнен ант эттим, –
Давуткъа ялан айтарыммы?
37Онынъ сою эбедиен кесильмез,
тахты къаршымда кунеш киби турар!
38 ^xКок юзюндеки догъру шаат олгъан ай киби,
о, эбедиен къатты олып турар!»

Сэла
39 ^yАмма энди Сен ред эттинъ, юзь чевирдинъ,
Озь Месихинъе пек гъазапландынъ,
40 ^zкъулунъа берген васиетинъден вазгечтинъ,
Онынъ таджыны топракъкъа аттынъ.
41 ^aaБутюн къораларыны йыкътынъ,
къалелерини харабеге чевирдинъ.
42Ёлдан кечкенлер эписи оны талай,
къомшуларынынъ алдында о масхара олды.
43Онъа къаршы чыкъкъанларгъа Сен гъалебе бердинъ,
бутюн душманларыны къувандырдынъ.
44Къылычынынъ уджуны къайтардынъ,
дженкте онъа кучь бермединъ.
45Онынъ йылтыравыны битирдинъ,
тахтыны исе ерге урдынъ,
46 ^abЯшлыкъ куньлерини къыскъарттынъ,
оны пек утандырдынъ.

Сэла.
47 ^acНе вакъыткъадже, я РАББИ,
Озюнъни эбедий сакъларсынъ?
Не вакъыткъадже гъазабынъ атеш киби янар?
48 ^adОмрюм не къадар къыскъа экенини хатырла!
Инсан огъулларыны бошуна яраттынъмы?
49 ^aeЯшагъан да, олюмни корьмеген адам бармы?
Олюлер дюньясындан джаныны къуртаргъан инсан бармы?

Сэла
50Эвельки буюк севгинъ къаерде къалды,
я РАББИ?
Давуткъа Озь садыкълыгъынънен ант эткен эдинъ.
51Къулларынъ не къадар масхара олгъаныны,
бутюн къудретли халкъларнынъ акъаретини
ичимде насыл ташыгъанымны хатырла,
я РАББИ!
52Душманларынъ насыл сёггенлерини,
Месихинънинъ излерини мыскъыллагъанларыны унутма,
я РАББИ!
53 ^afРАББИни эбедиен алгъышланъыз!
Амин! Амин!