Psalms 91
Шукюр йыры
1Зебур. Раатлыкъ куню ичюн йыр.2 aНе де яхшыдыр РАББИни шуретлемек,
Сенинъ Адынъа чалгъы чалмакъ, Юдже Алла!
3Саба – буюк севгинъни хабер этмек,
гедже исе – ишанчлы олгъанынъны!
4Он телли алет ве арфа чалып,
сантырны чалып йырламакъ яхшы!
5Я РАББИ, Озь ишлеринънен мени къувандырдынъ,
яраткъанларынъдан севинчнен къычырам!
6 bИшлеринъ не къадар буюктир, я РАББИ!
Пек терендир Сенинъ тюшюнджелеринъ!
7Акъылы етмеген адам буны бильмез,
ахмакъ да буны анъламаз.
8Ярамайларнынъ от киби пейда олгъаны,
акъсызлыкъ япкъанларнынъ гуль ачкъаны –
оларнынъ эбедий ёкъ олувы ичюндир.
9 cЛякин Сен, я РАББИ, эбедиен Юджесинъ!
10Душманларынъ, я РАББИ,
душманларынъ мытлакъа ёкъ олур,
акъсызлыкъ япкъанларнынъ эписи даркъалып кетер!
11 dЛякин кийик бугъа насыл бойнузыны котерип юрсе,
Сен башымны шойле котерип юрсетирсинъ!
Меним башыма тазе зейтюн ягъыны якътылар.
12 eДушманларым йыкъылгъаныны озь козюмнен корьдим,
манъа къаршы чыкъкъан яман душманнынъ къычыргъаныны
озь къулагъымнен эшиттим.
13 fИнсафлы адам хурма тереги киби гуль ача,
Ливандаки кедр тереги киби юкселип осе.
14 gРАББИнинъ Эвинде сачылгъан адамлар
Алламызнынъ азбарларында гуль ачарлар.
15Олар къартайгъанда да, чокъ мейва берерлер,
тазе ве ешиль олурлар,
16 hРАББИнинъ догърулыгъыны хабер этерлер,
«Къаям О, Онда ялан ёкъ», – дерлер!
Copyright information for
CrhCTB