Psalms 95
Раббини шурет этмеге чагъырув
1 aРАББИге янъы бир йыр айтынъыз!Эй, бутюн ер юзю, РАББИге йырланъыз!
2 bРАББИге йырланъыз, Адыны алгъышланъыз,
къуртарувыны кунь-куньден айтып беринъиз!
3 cШан-шуретини миллетлер арасында хабер этинъиз,
аджайип шейлерини бутюн халкъларгъа бильдиринъиз!
4 dАкъикъатен РАББИ улудыр!
О, чокъ макътавларгъа ляйыкъ!
Бутюн аллалардан зияде Ондан къоркъмакъ керек!
5 eХалкъларнынъ бутюн аллалары – бош путлардыр,
РАББИ исе коклерни яратты!
6О, шан ве шурет ичинде,
мукъаддес мескенинде – къудрет ве гузеллик!
7 fЭй, халкъ къабилелери, РАББИни алгъышланъыз,
РАББИнинъ шурети ве къудретини алгъышланъыз!
8РАББИнинъ Адына ярашкъан шуретини беринъиз,
бахшышлар кетирип, Онынъ азбарларына киринъиз!
9 gМукъаддес шуретинде олгъан РАББИге ибадет этинъиз!
Бутюн ер юзю, Онынъ алдында титре!
10 hХалкълар арасында бильдиринъиз:
«РАББИ – Падишадыр!»
Шунынъ ичюн дюнья къатты тура, о, къыбырдамаз асла.
Халкъларны О, адалетнен укюм этеджек!
11 iКоклер севинсин, ер юзю къувансын,
денъиз ве ичиндекилер гурьлесин!
12Тарлалар ве олардаки барлыкъ тантана этсинлер,
ормандаки бутюн тереклер къуванчнен къычырсынлар!
13 jБуны РАББИнинъ огюнде этсинлер!
О, мында келе, ерни укюм этмеге келе!
О, дюньяны Озь адалетинен,
дюнья халкъларыны акъикъатынен укюм этеджек!
Copyright information for
CrhCTB