Rev 11 | CrhCTB | STEP | Манъа таякъкъа ошагъан бир ольчю берип, бойле дедилер: – Тур, Алланынъ Сарайыны ве къурбан ерини ольче, анда ибадет эткенлерни де сай.

‏ Revelation of John 11

Эки шаат

1 ^aМанъа таякъкъа ошагъан бир ольчю берип, бойле дедилер:

– Тур, Алланынъ Сарайыны ве къурбан ерини ольче, анда ибадет эткенлерни де сай. 2 ^bЛякин Сарайнынъ тышкъы азбарыны къалдыр, оны ольчеме; о ер башкъа халкъларгъа берильген. Олар къыркъ эки ай ичинде азиз шеэрни хорлайджакълар. 3 Мен эки шаатыма къудрет береджегим, ве олар чувал безинден тикильген урбада 1 260 кунь пейгъамберлик япаджакълар.

4 ^cОлар дюньянынъ Раббиси огюнде тураджакъ эки зейтюн тереги ве эки лампат таягъыдыр. 5 ^dЭгер ким оларгъа яманлыкъ япмагъа истесе, агъызларындан атеш чыкъаджакъ ве душманларыны ашап ёкъ этеджек. Оларгъа яманлыкъ кетирмеге истеген ольдюрильмек керек. 6 ^eОлар пейгъамберлик япкъан куньлерде ерге ягъмур ягъмасын деп, кок юзюни багъламагъа къудретлери бардыр. Сувны къангъа айландырмагъа ве истеген вакъытта ер юзюни тюрлю беляларгъа огъратмагъа къудретлери де бардыр.

7 ^fОлар шаатлап битиргенден сонъ, тюпсюзликтен чыкъкъан джанавар оларнен дженк этеджек, оларны енъеджек ве ольдюреджек. 8 ^gОларнынъ джесетлери буюк шеэрнинъ мейданына ташланаджакълар. Шеэрнинъ ибретли ады «Содом» ве «Мысыр»дыр. Бизим Раббимиз анда хачкъа мыхлангъан эди. 9 ^hЭр халкълардан, къабилелерден, тюрлю тиль ве миллетлерден олгъан адамлар учь бучукъ кунь оларнынъ джесетлерини сейир этеджек ве олюлерни дефн этмеге разылыкъ бермейджеклер. 10 Ер юзюнде яшагъанлар бунъа севинип шенъленеджеклер ве бири-бирине бахшышлар ёллайджакълар, чюнки бу эки пейгъамбер ер юзюнде яшагъанларгъа чокъ азап берген эдилер. 11 ⁱУчь бучукъ куньден сонъ эки пейгъамбернинъ беденине Алла ёллагъан яшайыш руху кирди, ве пейгъамберлер аякъларына турдылар. Оларны корьгенлер буюк къоркъугъа далды. 12 ^jЭки пейгъамбер коктен кельген кучьлю бир сеснинъ:

– Мында чыкъынъыз! – дегенини эшитип, душманларынынъ козю огюнде булут ичинде кокке котерильдилер.

13 ^kО саатте кучьлю бир зельзеле олды, ве шеэрнинъ онда бири йыкъылды. Зельзеледе еди бинъ адам эляк олды. Къалгъанлары къоркъугъа далып, коктеки Алланы шуретледилер.

14 ^lЭкинджи беля кечти. Мына, учюнджи беля тезден келеята.

Единджи боразан

15 ^mЕдинджи мелек боразан чалды. Кокте кучьлю сеслер янъгъырады:

– Бу дюньянынъ падишалыгъы Раббимизнинъ ве Онынъ Месихининъ падишалыгъы олды. О, эбедиен падишалыкъ япаджакъ.

16 ⁿСонъ Алланынъ огюнде тахтларында отургъан йигирми дёрт акъсакъал ерге бетлеринен йыкъылдылар, Аллагъа ибадет эттилер 17 ^oве бойле дедилер: – Рабби-Тааля, Къудретли Алла!
Санъа бинъ шукюрлер олсун!
Сен эвельден олгъансынъ ве шимди де барсынъ.
Сен буюк къудретинъден файдаланып,
Падиша олдынъ.
18 ^pХалкълар гъазапланды,
Сенинъ де гъазабынъ чыкъты.
Олюлерни суд этмек вакъты кельди,
Сенинъ къулларынъа, пейгъамберлерге ве азизлерге,
эм де Сенден къоркъкъан буюклерге ве кичиклерге
озь акъларыны бермек вакъты кельди.
Ер юзюни харап эткенлерни ёкъ этмек вакъты да кельди!

19 ^qСонъ Алланынъ коктеки Сарайы ачылды. Алланынъ Сарайында Онынъ Васиет Сандыгъы корюнди. О вакъытта яшын яшнады, сеслер янъгъырады, кок гудюрдеди, зельзеле башланды, ве кучьлю бурчакъ ягъды.