Rev 15 | CrhCTB | STEP | Мен кокте даа бир буюк ве аджайип алямет корьдим: къолларында сонъки еди белясы олгъан еди мелек. Шу беляларнен Алланынъ гъазабы битеджек эди.

‏ Revelation of John 15

Еди мелек ве еди беля

1 ^aМен кокте даа бир буюк ве аджайип алямет корьдим: къолларында сонъки еди белясы олгъан еди мелек. Шу беляларнен Алланынъ гъазабы битеджек эди.

2 ^bСонъ мен атешнен къарышкъан джам денъизине ошагъан шейни корьдим. Айванны, онынъ путуны ве адынынъ сайысыны енъгенлер Алланынъ арфаларыны алып, бу джам денъизининъ устюнде тура эдилер. 3 ^cОлар Алланынъ къулу Мусанынъ йырыны ве Къозунынъ йырыны айтып, бойле дей эдилер: – Рабби-Тааля, Къудретли Алла!
Сенинъ ишлеринъ буюк ве аджайиптир.
Халкъларнынъ Падишасы!
Сенинъ япкъанларынъ догъру ве акътыр.
4 ^dЯ Рабби! Сенден ким къоркъмаз,
Адынъны ким шуретлемез?
Ялынъыз Сен Мукъаддессинъ.
Бутюн халкълар янынъа келип,
Санъа ибадет этеджеклер,
чюнки эр кеске адалетли арекетлеринъ ачылды.

5 ^eОндан сонъ бакъсам, Шаатлыкъ Чадыры, коктеки Сарайнынъ ачылгъаныны корьдим. 6 ^fЕди беляны туткъан еди мелек темиз ве йылтыравукъ кетен урбасыны кийип, кокюсине алтын къушакълар такъып, Сарайдан чыкътылар. 7 ^gДёрт айвандан бири еди мелекке эбедиен яшагъан Алланынъ гъазабына толу еди алтын пиаланы берди. 8 ^hАлланынъ Шуретинден ве Онынъ Къудретинден Сарай тютюнге толды. Еди мелекнинъ еди белясы битмегендже, ич кимсе Сарайгъа кирип оламады.