Rev 6 | CrhCTB | STEP | Сонъ мен Къозу еди печаттан бирини бозгъаныны корьдим. О вакъытта дёрт айвандан бири кок гудюрдисине ошагъан сеснен: – Кель мында!

‏ Revelation of John 6

Къозу печатларны боза

1 ^aСонъ мен Къозу еди печаттан бирини бозгъаныны корьдим. О вакъытта дёрт айвандан бири кок гудюрдисине ошагъан сеснен:

– Кель мында! – дегенини эшиттим.

2 ^bМен бакъсам, бир беяз атны, устюнде яйы олгъан атлыны корьдим. Онъа бир тадж берильген. О, енъиджи олып, душманларны енъмеге чыкъты.

3 Къозу экинджи печатны бозгъанда, экинджи айван:

– Кель мында! – дегенини эшиттим.

4 ^cО вакъытта башкъа, джийрен ат кельди. Адамлар бир-бирини ольдюрсин деп, атлыгъа ер юзюне дженк ёлламагъа акъкъы берильген. Онъа буюк къылыч да берильген.

5 Къозу учюнджи печатны бозгъанда, учюнджи айван:

– Кель мында! – дегенини эшиттим.

Бакъсам, къара бир ат келеяткъаныны корьдим. Онынъ устюндеки атлынынъ къолунда теразе бар эди. 6 ^dМен дёрт айваннынъ арасындан бойле бир сес эшиттим:

– Бир кило богъдай бир динаргъа, учь кило арпа бир динаргъа ^{▼▼Къ. юн. сёзю-сёзюне «бир хойникс богъдай бир денарионгъа, учь хойникс арпа бир денарионгъа» демектир. Бир денарион – бир куньлюк къазанч. Энъ адий махсулнынъ паалыгъы косьтериле.} олсун. Амма зейтюн ягъына ве шарапкъа зарар берме!

7 Къозу дёртюнджи печатны бозгъанда, дёртюнджи айваннынъ:

– Кель мында! – деген сесини эшиттим.

8 ^fБакъсам, бир агъаргъан ат келеяткъаныны корьдим. Аткъа минген атлынынъ ады Олюм эди. Онынъ артындан Олюлернинъ Дюньясы келеята эди. Оларгъа ернинъ дёртте бир къысмында къылычнен, ачлыкъ ве ольдюриджи хасталыкънен адамларны ольдюрмек ве оларгъа ернинъ кийик айванларыны йибермек акъкъы берильген.

9 ^gКъозу бешинджи печатны бозгъанда, къурбан ерининъ тюбюнде мен адамларнынъ джанларыны корьдим. Олар Алланынъ Сёзюни ве Онынъ акъкъында хаберни даркъаткъанлары ичюн ольдюрильген эди. 10 ^hОлар къычырып, кучьлю сеснен бойле дедилер:

– Эй, Мукъаддес ве Акъикъий Укюмдар, не ичюн бу вакъыткъадже укюм этмейсинъ, тёкюльген къанымыз ичюн дюньяда яшагъанларны джезаламайсынъ?

11 ⁱОларнынъ эр бирине беяз урба берильди ве къыскъа бир вакъыт даа беклемеге керек олгъаны айтылды, чюнки озьлери киби ольдюриледжек Алланынъ къулларынынъ ве дин къардашларынынъ сайысы толу олмагъа керек эди.

12 ^jКъозу алтынджы печатны бозгъанда, бакъсам, буюк зельзеле олды. Кунеш къара гедже киби къарарды, ай исе бутюнлей къан тюсте олды. 13 ^kКучьлю ель инджир терегини саллагъанда, пишмеген инджирлер ерге насыл тюшсе, коктеки йылдызлар ер юзюне ойле тюшти. 14 ^lКок ярылды ве, бурулгъан кягъыт киби, бурулды. Эр бир дагъ ве ада озь еринден кочьти. 15 ^mДюньянынъ падишалары ве буюклери, бинъбашылары, бай адамлары, къараманлары, къул ве азат олгъанлары къобаларда ве дагълардаки къаяларнынъ арасында сакъландылар. 16 ⁿОлар дагъ ве къаяларгъа:

– Устюмизге авдарылынъыз, Тахтта Отургъандан ве Къозунынъ гъазабындан бизни сакъланъыз! 17 ^oАлланынъ буюк гъазап куню кельди! Онъа ким даянып олур?! – деп ялвара башладылар.