‏ Romans 11

Алла Озь халкъыны ред этмеди

1 ^aМен сорайым: Алла Озь халкъыны ред эттими? Асыл ёкъ! Мен озюм Ибраимнинъ союндан, Биньямин къабилесинден бир исраиллим. 2 ^bАлла эвельден бильген Озь халкъыны ред этмеди. Исраильге къаршы чыкъып, Языда Ильяс не айткъаныны бильмейсинъизми?

3 ^c– Я Рабби! Олар Сенинъ пейгъамберлеринъни ольдюрдилер, къурбан ерлеринъни къырдылар. Ялынъыз мен къалдым, мени де ольдюрмеге истейлер.

4 ^dАлла онъа насыл джевап берди?

– Мен Озюм ичюн Баал путуна тиз чёкмеген 7 000 адамны сакъладым.

5 ^eШимдики вакъытта да бойле: Алланынъ эйилигинен сайлангъан бир къач адам бардыр. 6Яхшы ишлери ичюн дегиль, Алланынъ эйилиги ичюн сайлангъанлар. Акис алда эйилик энди эйилик олмаз эди.

7 ^fСонъ не? Исраиль истеген шейни алмады. Лякин оны бир къач сайлангъанлар алдылар, къалгъанларнынъ юреклери исе къатты олды. 8 ^gЯзылгъаны киби, Алла оларгъа къатты юкъу рухуны ёллады. Бу куньгедже козьлери корьмей, къулакълары эшитмей.

9Давут да бойле дей: – Оларнынъ софрасы озьлери ичюн тузакъ ве къапкъан,
гунагъа себеп ве джеза олсун.
10 ^hКозьлерини къаранлыкъ бассын, корьмесинлер,
беллери эбедиен букюлип къалсын.

Пытакълар акъкъында

11Шунынъ ичюн мен сорайым: еудийлер сюрюнген олсалар да, йыкъыладжакълармы? Асыл ёкъ! Амма куньджюлиги къозгъалсын деп, еудийлернинъ гунасы себебинден къуртулыш башкъа халкъларгъа кельди. 12Эгер еудийлернинъ гунасы бутюн дюньягъа эйилик олды исе, ве оларнынъ бозулувы башкъа халкъларгъа эйиликни кетирди исе, бутюн Исраиль къайткъанда, не къадар эйилик олур?!

13 ⁱЭнди сизлерге, башкъа халкълардан олгъанларгъа айтам: мен халкъларгъа ёлланылгъан эльчи олып, хызметимнен гъурурланам. 14Бельки, сойдашларымнынъ куньджюлигини къозгъайджагъым ве олардан базыларыны къуртараджагъым. 15 ^jОларнынъ ред этилюви бутюн дюньяны Алланен барыштырды; Алла оларны къабул этеджек вакъытта адамлар олюмден яшайышкъа къайтмазмы? 16 ^kЭгер Аллагъа багъышлангъан хамырнынъ биринджи парчасы азиз олса, бутюн хамыр да азиздир. Эгер тамыр азиз олса, пытакълары да азиздир. 17 ^lАмма багъчадаки зейтюн терегининъ базы пытакълары сындырылгъан олса, сен исе, кийик зейтюн пытагъы олып, оларнынъ арасына ашылангъан ве тамырдан кельген терекнинъ шырасына къошулгъан олсанъ, 18пытакъларнынъ огюнде макътанма. Макътансанъ, шуны биль: сен тамырны дегиль, тамыр сени котерип тура.

19Бельки сен: «Мени ашыламакъ ичюн, пытакълар сындырылды», – дерсинъ. 20Догъру, Исраиль халкъы имансызлыгъы себебинден сындырылды, сен исе иманынъда къатты турасынъ. Бунъа бакъмадан, макътанма, лякин Алладан къоркъ. 21 ^mЭгер Алла терекнинъ озь пытакъларыны аджымагъан олса, сени де аджымаз. 22Эм Алланынъ мераметини, эм де сертлигини акъылынъда тут. Йыкъылгъанларгъа О, серт бакъа, санъа исе мераметини косьтере. Лякин эгер Онынъ мераметинде булунмасанъ, сен де кесилип ташланырсынъ. 23Еудийлер имансызлыкътан вазгечселер, кене ашыланырлар. Алланынъ оларны кене ашыламагъа кучю бар. 24Эгер сен озь кийик зейтюн терегинъден кесилип, озюнъки олмагъан яхшы зейтюн терегине ашылангъан олсанъ, озь терегине пытакъларны кене ашыламакъ не къадар къолай олур.

Исраильнинъ илеридеки къуртулышы

25Агъа-къардашларым, сиз озюнъизни акъыллы тюшюнменъиз деп, бу сырны бильгенинъизни истейим: башкъа халкълардан тайинленген адамлар Аллагъа иман этмегендже, Исраиль халкъынынъ юреги вакътынджа къатты олур. 26 ⁿСонъ бутюн Исраиль къуртуладжакъ. Язылгъаны киби: – Сиондан Къуртарыджы келеджек
ве Якъупнынъ союндан имансызлыкъны узакълаштыраджакъ.
27Мен оларнынъ гуналарыны ёкъ эткенимде,
оларгъа бу васиетни береджегим.

28 ^oОлар Къуванчлы Хаберни къабул этмедилер ве Аллагъа сиз ичюн душман олдылар. Амма олар Алла тарафындан сечильгенлер, ве Алла оларны баба-деделери ичюн севе. 29Алланынъ эйилиги ве чагъырувы денъишмез.

30 ^pБир вакъытлары сизлер Алланынъ Сёзюни тутмай эдинъиз, амма еудийлер Сёз тутмагъаны ичюн, шимди мерамет корьдинъиз. 31Амма сизге мерамет кетиргенлер, энди Алланы динълемейип тургъанлар да мерамет кореджеклер. 32Эписине эйилик косьтермек ичюн, Алла эписине сёз динълемемеге ёл берди. 33 ^qАлланынъ зенгинлиги, Онынъ икмети
ве бильгиси не къадар сынъырсыз!
Онынъ къарарларына ич кимсенинъ акъылы етмез!
Онынъ ёлларыны ич кимсе анъламаз!
34 ^rАлланынъ акъылыны ким бильген?
Онынъ меслеатчысы ким олгъан?
35 ^sКим Аллагъа бир шей берген?
Кимге Алла къайтармакъ борджлудыр?
36 ^tЭр шей Ондан чыкъып,
Онынъ ярдымынен бардыр
ве Онынъ ичюндир.
Онъа эбедиен шурет олсун! Амин!