Rom 15 | CrhCTB | STEP | Бизге, иманы кучьлю олгъанларгъа, файдамызны къыдырмагъа дегиль, иманы кучьсюз олгъанларгъа ярдым этмеге керек.

‏ Romans 15

1 ^aБизге, иманы кучьлю олгъанларгъа, файдамызны къыдырмагъа дегиль, иманы кучьсюз олгъанларгъа ярдым этмеге керек. 2 ^bЭр биримиз агъа-къардашымызнынъ эйи файдасыны къыдырмагъа ве иманыны къавийлештирмеге керекмиз. 3 ^cМесих Озюнинъ файдасыны къыдырмай эди. Язылгъаны киби: «Сени яманлагъанларнынъ сёзлери меним башыма тюшти». 4 ^dЯзыда язылгъаны бизни огретмек ичюн язылгъан. Шунынъ ичюн сабыр этип ве Мукъаддес Язылардан юрекленип, биз ишанч тапмакъ мумкюнмиз.

5 ^eСабыр берген ве юреклендирген Алла сизге, Иса Месих огреткени киби, бири-биринъизнен бир фикирде олмагъа ёл ачсын. 6 Сонъ Раббимиз Иса Месихнинъ Бабасы олгъан Алланы бир юрекнен ве бир агъызнен шуретлеп олурсынъыз.

Иса эм еудийлер, эм башкъа халкълар ичюн кельди

7 Месих сизлерни къабул эткени киби, сизлер де бири-биринъизни къабул этинъиз ве бойле этип, Алланы шуретленъиз. 8 Динъленъиз: Алланынъ адалетлигини косьтермек ичюн, Месих еудийлернинъ хызметчиси олды ве бабаларымызгъа берильген ваделерни тасдыкълады. 9 ^fОндан гъайры, башкъа халкълар да оларгъа берильген эйилик ичюн Алланы шуретлемеге имкян таптылар. Язылгъаны киби: «Шунынъ ичюн чешит тюрлю миллетлернинъ огюнде
Санъа шукюрлер этеджегим,
Адынъа шан йырларыны йырлайджагъым».

10 ^gДаа бойле айтылгъан: «Эй, халкълар! Алланынъ халкъынен берабер къуванынъыз!»

11 ^hВе даа: «Эй, бутюн миллетлер, Раббини макътанъыз!
Эй, бутюн халкълар, Оны шуретленъиз!»

12 ⁱЕшая да айта ки, Йишайнынъ союндан ^{▼▼Къ. еуд. «Йишайнынъ тамырындан». Йишай – Давутнынъ бабасы эди.} Бири пейда оладжакъ, миллетлерге падишалыкъ япмагъа котериледжек; халкълар Онъа ишанаджакълар.

13 Ишанч берген Алла сизлерни къуванч ве тынчлыкъ-аманлыкъкъа толдурсын; сизинъ ишанчынъыз Мукъаддес Рухнынъ кучюнен бол олсун!

Павел – башкъа халкъларгъа ёлланылгъан эльчи

14 Агъа-къардашларым, мен эминим ки, сизлер яхшылыкъкъа толусыз, эр шейни билесиз ве бир-биринъизге акъыл огретип оласыз. 15 Амма, агъа-къардашларым, бу мектюпте мен сизге бир къач шейлерни ачыкъ-айдын язып, Алла манъа берген эйилигини акъылынъызгъа кетирмеге истедим. 16 ^kАлланынъ эйилигинен Иса Месих мени халкъларгъа хызмет этмеге ёллады, ве, Мукъаддес Рух халкъларны азиз этсин ве Алла оларны, истегенине бахшыш киби, къабул этсин деп, мен руханийге ошап, Алланынъ Къуванчлы Хаберини бильдирем.

17 Бойлеликнен, Иса Месихнен бирликте мен Алланынъ ёлунда япкъан ишлеримнен макътансам олур. 18 – 19 ^lМесих меним ярдымымнен япкъанларындан гъайры ич бир шейни айтмагъа юрекленмейим. Сёзнен ве ишнен, бельгилерни косьтерип ве аджайип ишлерни япып, Алланынъ Рухунынъ кучюнде Месих меним вастамнен халкъларны имангъа кетире эди. Бойле этип, Месих акъкъында Къуванчлы Хаберни Ерусалимден башлап, тап Иллирик дагъларына къадар бутюнлей илян эттим. 20 ^mБойлеликнен, башкъалары къургъан темель устюне бина къурмайып, Къуванчлы Хаберни Месихнинъ Ады даа белли олмагъан ерлерде бильдирмеге тырыштым. 21 ⁿЯзылгъаны киби, Ондан хаберсиз олгъанлар корерлер, Онынъ акъкъында эшитмегенлер анъларлар.

22 ^oШунынъ ичюн сизге бармагъа чокъ кере ниет этсем де, келип оламадым.

Павелнинъ Римге бармакъ ниети

23 ^pЭнди бу ерлерде манъа иш къалмады. Амма чокъ йыллардан берли сизлерни корьмеге истей эдим. 24 Испаниягъа кетсем, кечип кеткенде сизнен корюшмеге ве сизнен бираз субетлешип, ёлумны девам этмеге ишанам. 25 ^qАмма шимди Алланынъ азизлерине хызмет этмеге Ерусалимге кетем. 26 ^rМакедония ве Ахаядаки иманлылар Ерусалимдеки фукъаре иманлыларгъа ярдым ёлламагъа истедилер. 27 ^sИстеген олсалар да, керчектен еудийлерге борджлулар. Еудийлер башкъа халкъларнен Алланынъ бахшышларыны пайлаштылар, шунынъ ичюн халкъларнынъ иманлылары да еудийлернинъ яшайышына керек олгъан шейлерни бермеге борджлулар. 28 Демек, топлангъан ярдымны оларгъа берип, бу ишни беджергенимден сонъ, сизинъ еринъизден кечип, Испаниягъа бараджагъым. 29 Билем ки, сизге кельгенде, Месихнинъ бол бахшышыны кетиреджегим.

30 Агъа-къардашларым, Раббимиз Иса Месих Адындан Рухнынъ севгисинен сизге ялварам: меннен берабер гъайретнен меним ичюн Аллагъа дува окъунъыз: 31 ^tЕудиедеки имансызлардан къуртулайым, Ерусалимдеки азизлер хызметимден разы олсунлар, 32 ^uАлланынъ истегинен мен къуванчнен сизге келип, сизнен берабер раат олайым. 33 ^vТынчлыкъ-аманлыкъ берген Алла эпинъизнен олсун. Амин.