‏ Romans 3

Алланынъ акълылыгъы ве адамларнынъ акъсызлыгъы

1 ^aЕудий олгъанынынъ ве сюннет олгъанынынъ не устюнлиги ве файдасы бар?

2 ^bЭр тарафтан чокътыр. Бу устюнлик энъ эвеля бойледир: оларгъа Алланынъ сёзлери ишанып берильди.

3 ^cЭгер исе олардан базылары имандан вазгечкен олсалар, вазгечкенлери ичюн Алла олардан вазгечеджекми?

4 ^dЭльбетте ёкъ! Эр бир адам яланджы олса да, Алла сёзюни тута. Язылгъаны киби, Алла сёзлерини беджереджек ве Оны къабаатлагъанлардан устюн оладжакъ.

5Амма бизим акъсызлыгъымыз Алланынъ акълылыгъыны даа зияде косьтерсе, не айтайыкъ? Адамнынъ фикрине коре айтам: башымызгъа хышымыны ягъдыргъанда, Алла акъсыз олмазмы?

6Эльбетте ёкъ! Ойле олса, Алла дюньяны насыл суд этмек мумкюн?

7 ^eЭгер меним догъру олмагъаным ярдымынен Алланынъ догърулыгъы даа буюк ве шуретли олса, мени, гунакяр оларакъ, даа суд этмек мумкюнми?

8 ^fСонъ, яхшылыкъкъа айлансын деп, яманлыкъ япайыкъмы? Базылары мени яманлап, бизим огреткенимиз акъкъында бойле дейлер. Бу адамларны адалетли джеза беклей.

Алланынъ козю огюнде ич бир инсафлы ёкъ

9 ^gБойлеликнен, башкъа халкъларгъа бакъкъанда, бизде, еудийлерде, устюнлик бармы?

Асыл ёкъ! Косьтергенимизге коре, эм еудийлер, эм башкъа халкълар эписи гуна астындалар. 10Бойле де язылгъан: – Ич бир инсафлы адам ёкъ.
11Ич бир акъыллы олгъан, Алланы къыдыргъан кимсе ёкъ.
12 ^hЭписи ёлдан урулды, бозулдылар.
Яхшылыкъ япкъан ич кимсе ёкъ, бир адам биле ёкъ!
13 ⁱОларнынъ богъазы – ачыкъ табуттыр, озь тиллеринен алдаталар,
дудакъларында къара йыланнынъ зеэридир.
14 ^jАгъызлары лянетке ве аджджы сёзлерге толу.
15Къан тёкмек ичюн олар тез чапалар.
16Юрген ерлерине къаза ве белялар кетирелер,
17 ^kтынчлыкъ-аманлыкъ ёлуны бильмейлер,
18 ^lоларнынъ козьлеринде Алладан къоркъу ёкътыр.

19Энди биз билемиз, Къанун нени буюргъан олса, Къанунгъа коре яшагъанлар ичюн буюра. О вакъытта ич кимсе озюни акъламакъ ичюн бир сёз айтып оламаз ве Алланынъ огюнде бутюн дюнья къабаатлы оладжакъ. 20 ^mОнынъ огюнде ич кимсе Къанунны беджергенинен акъланып оламаз. Къанун адамларгъа гунанынъ не олгъаныны тек косьтере.

Иманда акъланув

21 ⁿАмма шимди, Къанунгъа багълы олмагъан, Алла берген акъланув ёлу ачылды. Бу ёл акъкъында эм Къанун, эм пейгъамберлер хабер этелер. 22Алла Иса Месихке инангъан эр бир адамны оларнынъ иманы ичюн акълай. Ве бунда адамларнынъ арасында ич бир фаркъ ёкъ. 23Эр кес гуна япты ве Алла берген шуретни алып оламай, 24 ^oамма Алланынъ эйилигинен гунакярлар бедава акъланув алалар, чюнки Иса Месих одеме берип, оларны къуртарды. 25 ^pЭписи адамларнынъ козю огюнде Алла Исанынъ тёкюльген къанына инангъанларнынъ гуналары ичюн Исаны одеме оларакъ берди. Шунынънен, Озюнинъ акълыгъыны ачыкътан косьтерди ве адамларнынъ эвельден япылгъан гуналарыны акълады. 26Кечкен заманларда Алла гуналаргъа сабырнен чыдай эди, шимди исе Озюнинъ акълылыгъыны ве адалетли олгъаныны косьтере ве Исагъа иман эткенлерни акълай.

27 ^qЭнди макътанмагъа бир шейимиз къалдымы? Къалмады!

Къайсы къанунны беджергенинен макътанайыкъ? Ишлер истеген къанунны беджергениненми? Ёкъ, иманны истеген къануннен макътанайыкъ! 28 ^rБиз шуны тасдыкъ этемиз: адам Къанун истеген ишлерни япкъанынен дегиль, иманынен акъланыр.

29 ^sАлла тек еудийлернинъ Алласымы? О, башкъа халкъларнынъ да Алласы дегильми? Эльбетте, О, башкъа халкъларнынъ да Алласы! 30 ^tАлла бирдир. О, сюннет олгъанларны оларнынъ иманы ярдымынен акълай, сюннет олмагъанларны да Иса Месихке олгъан иманы ичюн акълай.

31 ^uДемек, биз иман ярдымынен Къанунны ёкъ этемизми?

Асыл ёкъ! Иман ярдымынен биз Къанунны къавийлештиремиз.